Covalima (RCCT) 10-06-25-Administrado Postu Administrativu (APA) Suai, hahu fahe informasaun ba komunidade sira hodi halo preparasaun liu liu garantia ambiente mos no trankuilidade tanba tinan ne’e Munisipiu Covalima sei sai uma na’in ba eventu festival fronteira,
APA Suai, Ildefonso Maria Amaral, dehan lia ne’e wainhira kontunia hala’o reuniaun ho Lideransa Komunitaria no Ofisial Polisia Suku no KPK sira iha Suku Kamenasa, .Tersa semana ne’e
“Ita desimina kedas informasaun, atu nune’e ita kria ambiente ida mos, bele halo limpeza jeral, no mos prepara ita nia juventude. OPS no Xefe Suku atu hamutuk ho organizasaun arte marsiais sira iha suku laran halo limpeza no mos apaga tiha organizasaun nia naran ne’ebé pinta iha fatin publiku hanesan moru lolon, estrada ibun, atu nune’e iha festival fronteira ita nia bainaka sira husi Oekusi ka Maliana inklui maluk sira husi Malaka, Atambua tama mai partisipa iha festival ida ne’e hare ambiente di’ak” dehan APA Suai.
APA Suai salienta katak sei konfirma ho Prezidente Autoridade hodi hetan orientasaun konaba rekolla tipu kultura hodi bele halo performasaun iha palku aprezentasaun Festival Kultura Fronteira.
“Hau ata rasik sei konfirma ho parte munisipiu atu nune’e bele hare orientasaun saida maka atu mensiona iha Festival Fronteira ne’e, nune’e mos ha’u bele hatutan informasaun ba iha suku lima iha Postu Suai hodi bele preparasaun iha ne’ebé di’ak liu tan” nia informa.
Liu husi reuniaun konsellu komunitaria ne’e Administrado Postu Administrativu Suai mos husu ba Lideransa Komunitaria sira atu hatutan informasaun ba komunidade sira iha kamenasa nune’e bele iha preparasaun ida ne’ebé di’ak, sai prontu hodi partisipa iha eventu Festival Fronteira tinan 2025 ne’e.
Jornalista : Julio Salinas
Editor : Chamot Nahac
