COVALIMA (RCCT) 01-02-2023–Xefe Suku Belekasak, Leonito Gusmão, Hateten populasaun iha Postu Administrativu Maukatar kompostu husi Suku 4 hanesan Suku Belekasak, Ogues, Holpilat no Matai, hamutuk 13,429 to’o oras ne’e seidauk simu Sesta Bazika tanba problema finanseiru iha Sekretaria Estadu Kooperativa (SEKOOP).
“Loloos distribuisaun sesta bazika iha postu administrativu Maukatar hahu iha Janeiru 2023, maibe la realiza, ha’u hanesan autoridade lokal telefoni direita ba iha kompaña ne’ebé atu halo distribuisaun sesta bazika ba postu ida ne’e, maibe sira husi kompaña hatan katak ami husi kompaña laiha problema konaba distribuisaun, sasan balu ami kompras tiha ona, maibe problema ne’e iha Sekretaria Estadu Kooperativa (SEKOOP) sei iha failansu finanseiru tuir informasaun ne’ebé iha” informa Xefe Suku Belekasak Leonito Gusmão ba jonalista sira iha salaun Administrasaun Munisipiu Covalima, Kuarta (01/03).
Leonito afirma tuir informasaun ne’ebé xefe suku 4 halo konkordansia ho kompaña ne’ebé atu halo distribuisaun sesta bazika iha momentu fulan Dezembru 2022, ne’e iha ona konkordansia asinatura husi xefe suku na’in 4, hanesan xefe suku Belekasak, Ogues, Matai no Holpilat maibe to’o ohin loron distribuisaun la akontese.
Xefe suku Belekasak dehan, nia parte mos ladun hatene kompaña nia naran maibe kompaña ne’e Timor oan ida husi Munisípiu Bobonaro maka manan tenderizasaun atu halo distribuisaun sesta bazika mai iha Postu Administrativu Maukatar.
Nia dehan parte kompaña prontu atu halo distribuisaun maibe husi parte governu liu husi SEKOOP haruka kompaña hein laiha labele distribui lai sasan, maibe durante ne’e povu Maukatar hein hela sesta bazika ne’e.
“Iha momentu ita halo asina akordu entre suku 4 ho kompaña halo asina kedas rekezitus distribuisaun sasan sira ne’ebé konkorda iha momentu ne’eba sira promete katak iha fulan Janeiru 2023 sira atu hahu halo distribuisaun, maibe to’o ohin loron la akontese tanba dehan sei problema finanseiru husi governu, sasan iha item 10 resin no ami konkorda ho sasan sira ne’ebe atu distribui ba komunidade sira” informa xefe suku Leonito.
Entertantu total benefisariu iha Postu Administrativu Maukatar, kompostu husi Suku 4 hamutuk ema na’in 13.429, total uma kain 3.189 ne’ebé durante ne’e hein hela atu simu sesta bazika ne’ebé atu distribui husi governu liu husi SEKOOP.
Entertantu to’o nutisia ne’e hatun seidauk hetan konfirmasaun husi parte kompaña no governu liu husi SEKOOP konaba asuntu refere.
Jornalista : JS
Editor : CN
