COVALIMA (RCCT) 01-02-2023—–Xefe Suku Belekasak, Leonito Gusmão, Hateten populasaun iha Postu Administrativu Maucatar kompostu husi Suku 4 hanesan Suku Belekasak, Ogues, Holpilat no Matai, hamutuk-13.429 to’o oras ne’e sei dauk simu cesta bazika tanba problema finanseiru iha Sekretaria Estadu Kooperativa (SEKOOP).
“Loloos distribuisaun cesta bazika iha postu administrativu Maucatar hahu iha Janeiru 2023, maibe la realiza, hau hanesan autoridade lokal telefoni direita ba iha kompañia ne’ebe atu halo distribuisaun cesta bazika ba postu ida ne’e, maibe sira husi kompaña hatan katak ami husi kompaña laiha problema kona-ba distribuisaun, sasan balu ami kompras tiha ona, maibe problema ne’e iha Sekretaria Estadu Kooperativa (SEKOOP) sei iha failansu finanseiru tuir informasaun ne’ebe iha” informa Xefe Suku Belekasak Leonito Gusmão ba jonalista sira iha salaun Administrasaun Munisípiu Covalima, Kuarta (01/03).
Notisia Relevante : https://radiosuai.blogspot.com/2023/03/problema-finanseiru-iha-sekoop-povu.html
Leonito afirma tuir informasaun ne’ebe xefe suku 4 halo konkordansia ho kompaña ne’ebe atu halo distribuisaun cesta bazika iha momentu fulan Dezembru 2022 ne’e iha ona konkordansia asinatura husi xefe suku na’in-4, hanesan xefe suku Belekasak, Ogues, Matai no Holpilat maibe to’o ohin loron distribuisaun la akontese.
Xefe suku dehan nia parte mos ladun hatene kompaña nia naran maibe kompaña ne’e Timor oan ida husi Munisípiu Bobonaro maka manan tenderizasaun atu halo distribuisaun cesta bazika mai iha Postu Administrativu Maucatar.
Nia dehan parte kompañia prontu atu halo ona distribuisaun maibe husi parte governu liu husi SEKOOP haruka kompaña hein laiha labele distribui lai sasan, maibe durante ne’e povu Maucatar hein hela cesta bazika ne’e.
“Iha momentu ita halo asina akordu entre suku 4 ho kompaña halo asina kedas rekezitus distribuisaun sasan sira ne’ebe konkorda iha momentu ne’eba sira promete katak iha fulan Janeiru 2023 sira atu hahu halo distribuisaun, maibe to’o ohin loron la akontese tanba dehan sei problema finanseiru husi governu, sasan iha item 10 resin no ami konkorda ho sasan sira ne’ebe atu distribui ba komunidade sira” informa xefe suku Leonito.
Entertantu total benefisariu iha Postu Administrativu Maucatar, kompostu husi Suku-4 hamutuk ema na’in-13.429, total uma kain-3.189 ne’ebe durante ne’e hein hela atu simu cesta bazika ne’ebe atu distribui husi governu liu husi SEKOOP.
Entertantu to’o nutisia ne’e hatun seidauk hetan konfirmasaun husi parte kompañia no governu liu husi SEKOOP kona-ba asuntu refere.(JS).
