Covalima (RCCT) 30-10-23- Populasaun Aldeia 9 iha Suku Debos, Postu Administrativu Suai, Sei Nafatin fo konfiansa ba Agustinho da Silva, Re-Eleitu nudar xefe suku iha eleisaun ba orgaun suku ne’ebé foin liu ba iha loron 28 Fulan Outubru ne’e.
Kandidatu Xefe Suku iha Debos ne’ebé kompete ba Eleisaun orgaun Suku iha loron 28 fulan Outubru ne’e hamotuk ema na’in 3, kompostu husi Agustinho da Silva, Basilio Borges no Quintino Amaral Barros. Maibe Komunidade Suku Debos Maioria mak fo Votu ba Atual Xefe Suku Agustinho da Silva hodi re-eleitu ho total votu hamotuk 2,647, Basilio Borges hetan Votu 601 no Kandidatu Quintino Amaral Barros hetan Votu 227.
Nune’e Xefe Suku Re-Eleito, Agustinho da Silva Ko’alia ba RCCT dehan, sei kontinua halo devenvolvimentu iha Suku Debos, liu liu kontinua ho Programa sira ne’ebé lakonsege finaliza iha tinan hitu ba kotuk hodi tau prioridade ba dezenvolvimentu Infrastrutura iha Aldeia sira.
“Tinan hitu ba oin ne’e ha’u sei halo servisu ne’ebé lakonsege remata iha tinan hitu liu ba ne’e, Prioridade ba Aldeia balu ne’ebé mak dezenvolvimentu infrastrutura seidauk iha, Liu liu loke estrada foun iha aldeia balu nune’e hodi komunidade sira desloka hodi halo uma ba nune’e sira labele hela hamotuk iha uma ida familia nain rua mak hamotuk iha uma ida” Xefe re eleito Agustinho da Silva informa.
Ba Mandatu tinan hitu mai, Agustinho da Silva sei halo preparasaun tanba hakarak halo “Pememakan” suku nune’e Aldeia haat husi suku debos mak hanesan Aldeia Busakukun, Lakonak Babu, Lakonak Besik no Aldeai Lontale, prepara atu hari suku foun iha Postu Administrativu Suai Munisipiu Covalima hodi hein wainhra Covalima simu camara Munusipiu.
“Ha’u nia Planu iha Tinan hitu ida ne’e, tanba suku debos ne’e populasaun barak kuaze rihun sanulu resin tolu, maka ha’u sei halo “pemekaran” ba suku hodi halo preparasaun, aldeia hat Aldeia Busakukun, Lakonak Babu, Lakonak Besik no Aldeai Lontale hodi estabelese suku foun ida, ita sei ko’alia ho intelektual sira hodi halo preparasaun, wainhira covalima sai ona camara munispiu ita hein halo pedido ba prezidente ho husi atu hari suku foun ne’e, ida ne’e hanesan planu ida para aldeia hat ne’e bele sai suku ida hanesan Debos 1, debos 2” nia esplika.
Nia mos afirma komunidade suku debos iha Aldeia 3 mak seidauk asesu ba be mos ho digno mak hanesan, aldeia Busakuku, Aldeia, lookeu foho, maibe iha Aldeia lakonak babu dadaun ne’e halo ona perfurasaun ba be mos no hein deit halo kanalizasaun hodi distribui be ba komunidade sira, tan ne’e iha mandatu foun ne’e sei tau prioridade hodi halo perfurasaun be mos ba komunidade sira ne’ebé mak seidauk asesu ba be mos ho digno.
“Suku debos iha Aldeia 3 mak seidauk asesu ba bem mos mak Aldeia busakukun, lookeu, maibe iha lakona babu agora ita halo ona perfurasaun no kanalizasaun la’o hela lakleur tan sira atu asesu ona be mos, agora iha mandatu ida ne’e hau sei tau prioridade atu halo perfurasuan be mos ba komunidade sira iha aldeia lookeu foho no esforsu para aldeia busakukun, komunidade sira bele asesu ba be mos ho dignu” tenik nia.
Agustinho da Silva ne’ebé re eleitu dala ida tan ba Xefe Suku Debos, nafatin husu ba Populasaun Suku Debos atu nafatin fo apoiu ba nia hodi halo dezenvolvimentu ne’ebé di’ak liu tan iha Suku Debos.
Entretantu Total Eleitor sira ne’ebé tuir vota iha suku debos hamotuk rihun tolu atus lima, walu nulu resin hitu, husi total eleitor ne’e produz votu nulu hamotuk atus ida lima nulu, votu branku tolu nulu resin sia no votu validu hamotuk rihun tolu atus tolu, sia nulu resin walu.
Jornalista : Julio salinas
Editor : Chamot Nahac
