Covalima (RCCT) 13-05-25-Polísia Nasionál Timor-Leste (PNTL) hala’o Empozisaun diviza ba promosaun tranzitoria no Promosaun Antguidade ba membru Polisia Nasional Timor-Leste (PNTL) Munisipiu Covalima na’in 139, kompostu husi Postu Superintendente Assistente Polisia na’in ne’en (6), Inspetor Xefe Polisia na’in ne’en (6), Inspetúr Polisia na’in walu (8), Inspetur Assistente Polisia na’in 35, Sarjentu Xefe Polisia na’in 49, Primeiru Sarjentu Polisia na’in 25, inklui Ajente Xefe Polisia na’in ne’en (6), Agente Prinsipal Polisia na’in ha’at (4).
Partisipa iha empozisaun diviza ba membru na’in 139 iha covalima ne’e, Reprejentante Komandante Jeral PNTL, Superintendenti Xefe, Inspetor Jorge Monteiro, enkoraja membru polisia sira atu kontinua hatudu prestasaun servisu ho displina no onestidade, nafatin tau esperasan ba estadu no povu timor leste hodi tane as dignidade nasaun nian.
“Ha’u hakarak hatene katak prestasaun de servisu ho diploma ho onestidade ho seriedade ho realidade ho neutralidade no imparsialidade no profisional hanesan esperansa no espetativa estadu, ita nia governu ita nia instituisaun ita nia sidadaun, ne’ebé ita tenki ser kria posiblidade sira hotu hotu, esforsu sira hotu hotu hodi tane as nafatin, hodi bele servi no protreze” Reprezenta Komandante Jeral PNTL, Inspetor Jeral, Superintendenti Xefe Polisia Jorge Monteiro, dehan.
Monteiro dehan ba promividu na’in 139 katak diviza ne’ebé sira simu la’os oferta gratuita maibe ida ne’e hanesan rekuiñesementu husi Estadu Timor-Leste ba membru PNTL nia sira direitu fundamental no prisipalmente ba dedikasaun servisu durante tinan barak nia laran.
“Ha’u hakarak hatete ba empozadu individu ida por ida no ba emi nia família ba komunidade no ba sosiedade sira hotu no ba karisima sira hotu ne’ebé maioria prezensia iha ne’e katak deviza promosaun tranzitoriu no mós diviza de formasaun antigudade ne’ebé oras ne’e atribui ona ba ita bo’ot sira, ne’e la’ós oferta gratuita, la’os premiu gratuita la’os presente gratuita, la’os mos rekompensa gratuita, maibé ida ne’e nu’udar rekuiñesimentu alto husi estadu, governu no instituisaun Polísia Nasionál Timor Leste ba ita bo’ot sira nia direitu fundamental no prinsipál nu’udar membru PNTL ba ita bo’ot sira nia displina de servisu ekselente no profesional ba ita bo’ot sira nia lealidade no protidadun de servisu iha tinan naruk nia laran, ba ita bo’ot sira nia umilidade de servisu iha misaun de servisu no proteze no ba ita bo’ot sira nia dedikasaun profisional sira iha PNTL no ba ita bo’ot sira nia sakrifisu ektra ordinariu sira hotu hotu durante tinan naruk iha instituisaun PNTL” Tenik Monteiro.
Governu Timor Leste ne’ebé reprezenta husi Ministra Edukasaun, Dulce de Jesus hatete PNTL tenki kontinua motiva membru sira hodi hala’o sira nia servisu di’ak liutan, nune’e bele kontribui ba iha sosiedade ida ne’ebé seguru no morin trankuilidade iha futuru.
“Mezmu iha dezafiu barak tebes tebes maibé ita bo’ot sira halo PNTL atu sai metin, ita bo’ot sira tenke servisu ho responsabilidade, responsabilidade, profisionalidade, honestidade integridade, kredibilidade no kualidade atendimentu iha ita nia povu. Ha’u fiar katak ita bo’ot sira nia emposadu sira prense maioria ho rezimentu ne’ebé ho valor di’ak.”
“Liu husi oportunidade ida ne’e hakarak atu dehan katak impozisaun devisa ne’e alende forma kompremisu ba servisu di’ak ne’ebé hala’o ona. Ne’e mós nu’udar komitmentu husi governu fo apresiasaun ba membru PNTL ne’ebé prestasaun no dedikasaun de servisu di’ak. Espera katak kontinua fo motivasaun ba kada membru PNTL sira atu halao servisu di’ak liu tan atu nune’e bele kontribui ba sosiedade seguru no trankuilo iha futuru” Ministra Edukasaun, Dulce de Jesus dehan.
Komandu PNTL Munisipiu Covalima hala’o Serimónia empozisaun deviza ba promosaun tranzitoria no promosaun antiguidade ne’e iha kampu futsal St. Antonio Polisia Munisipiu Covalima, iha ne’eba, Ministra Edukasaun mak sai nu’udar Inspetora Serimonia, partisipa mos husi Prezidente Komisaun Promosaun Tranzitoria ne’ebé Reprezenta Ministro Interior, Inspetur Jeral PNTL, Superintendenti Xefe Polisia Jorge Monteiro, Reprezenta Komandante Jeral PNTL, Diretór Justisa no Disiplina PNTL, Xefe Departementu Formasaun e Pessoal no Ofisiais sira seluk, partisipa mos husi relijozas sira, Prezidente Autoridade Munisipiu Covalima, Prezidente CMCLN Munisipiu Covalima inklui Komunidade no Asosiaun Espoza no Maridu PNTL (AES-PNTL) Covalima.
Jornalista : Alfredo Barreto
Editor Chamot Nahac
