Covalima (RCCT) 12-09-23–Polisia Nasional Timor Leste (PNTL) iha Munisipiu Covalima kohi (Kaptura) Sidadaun na’in hat, husi Aldeia Lela, Suku Holpilat, Postu Administrativu Maukatar ne’ebé uza motorizada hatama sigaru mai Covalima liu husi dalan ilegal.

PNTL Covalima, Lidera husi Komandante Munisipiu Superintendente Calisto Gonzaga, Tersa dader Madrugada (12/09), hala‘o operasaun ne’ebé iha bairo Fatulor, Suku Ogues. Postu Administrativu Maukatar, kaptura sidadaun na’in 4 ne’ebé tula ho motorizada sasan kontra bandu tama mai Covalima husi indonesia kona dalan Ilegal.

“Ohin madrugada, ita konsege halo apreensaun ba sidadaun na’in hat ne’ebe ho motorizada tula sasan kontra bandu hanesan sigaru husi lndonesia lori mai iha Postu Suai atu ba fa’an iha merkadu,“ Esplika Komandante PNTL Covalima, Superintendente, Polisia, Calisto Gonzaga, ba jornalista sira, iha nia servisu fatin, Santa Rosa, (12/09).

Motozada hat ne’ebé Sidadaun sira uza hodi tula sigaru tama mai Covalima kona dalan ilegal ne’e, motor tolu iha dokumentu kompletu mak hanesan, Revo ho nia xapa matrikula K 5413, Supra X ho xapa matrikula D 1061, Revo ho xapa matrikula J 7710, Maibe motorizada ho marka Honda Verza 125, laiha dokumentu no Xapa matrikula.

Sai hanesan evidensia ne’ebé Sura ba osan, sasan kontra bandu hanesan Sigaru, Marlboro, Gudang Garam no Joker, ne’ebé Sidadaun na‘in hat tula ho motorizada hat ne’e konta hamotuk besik osan dollar amerikanu $4000-resin.

“lta halibur ona evidensia hanesan motor hat, telefone hat ho nia kolega na’in rua ne‘ebe prontu atu fa’an, na‘in ida fa’an iha merkadu Debos no na‘in ida fa’an iha Suku Beco,” nia dehan.

Engkuantu, Suspeitu ho naran inisial GO, envolve kazu ho tipu krime kontra bandu ho Numero Unico Crime (NUC). 0018/23.CV.MCT, lori sigaru Surya ne’e iha Ball ida (1) ho slop 20 no sigaru Orbit ne‘e iha Ball 3 (slop 62).

Suspeitu ho naran inisial MS ne‘e envolve krime kazu ho tipu krimi kontra bandu ho NUC. 0018/23.CV.MCT, hatama sigaru Dji Samsu kor kinur bal 3 (slop 60) sigaru Dji Samsung kor metan bal 1 (slop 20)

Suspeitu ho naran inisial BM, envolve kazu ho tipu krime kontra bandu ho NUC.0018/23.CV.MCT, lori sigaru Surya ne‘e ball 1 (slop 20), sigaru Orbit ne‘e ball 1 (slop 20) no tabaku Joker metan bantal 22.

Suspeitu ho naran inisial AL, Sigaru Marlboro mean ball 1 (slop 20), sigaru Marlboro mutin ball 1 (slop 20), sigaru Marlboro metan ball 1 (slop 20).

Nune’e, Kamandante PNTL Covalima husu ba populasaun sira hela iha fronteira labele sosa sasan kontra bandu no hatama mai Covalima liu husi dalan ilegal, tanba ne’e sei prejudika populasaun sira no hetan sansaun kuandu PNTL Prende.

Jornalista : JS

Editor      : CN