Cordenador Jeral PN-BESI-TL, Januario Amaral de Jesus, hatete enkontru preliminaria ne’e parte ida husi programa boa governasaun nian ne’ebé atu tau matan ba forsementu publiku liliu be no saneamentu.
“Enkontru preliminariu ida ba programa boa governasaun ka asaun sidadaun nian hodi tau matan, liliu hare ba fornesementu publiku be no saneamentu ne’ebé maka ita hetan apoiu ka parseria husi governu liu husi gabinete apoiu sosiedade sivil, iha Munisipiu Covalima ita foka liu ba iha Suku Dato Tolu no Fohorem ne’ebé hala’o atividade ida hanaran Kartaun Pontuasaun Komunidade (KPK), tan ne’e maka objetivu enkontru ida ohin ne’e hanesan inisiu ka enkontru dahuluk ida entre entidades relevante sira liliu autoridade munisipiu, postu, suku inklui diresaun relevante sira no mos organizasaun sosiedade sivil,” esplika Kordenador Jeral PN-BESI-TL, Januario Amaral de Jesus.
Nia dehan tan “Ita nia parseiru sira ne’ebé maka iha munisipiu para oinsa bele fahe informasaun konaba objetivu husi programa ne’e rasik no oinsa husu mos apoiu ka koperasaun husi parte autoridade munisipiu to’o postu no mos suku para bele servisu hamutuk inklui ita nia parseiru sira hodi bele realiza programa ka atividade ida ne’e bele lao ho di’ak to’o remata ho susesu,” Tenik nia.
“Iha Covalima implementa iha suku rua suku Fohorem ho Dato Tolu ne’ebé maka ita sei halo atividade ida ohin kartaun postuasaun komunidade ba hare tuir fornesementu be mos ba ita nia komunidade sira, halo avaliasaun ba nia prosesu konstrusaun sira liliu ninia operasaun ho manutensaun kanalizasaun b’e ne’e lao di’ak ka lae, grupu maneja fasilidade ne’e funsiona ka lae inklui mos tanki sira ne’e inkluzivu ka lae, fornesementu ba fasilidade publiku hanesan saude, eskola iha ka lae no mos ligasaun ho buat naran mudansa klimatika dala ruma mos afeta ba ita nia rekursu be sira nia labele garante fornesementu be ba komunidade sira ho di’ak” Cordenador Jeral PN-BESI-TL, Januario Amaral de Jesus hakotu.
Sekretariu Munisipal Asuntu Sosiais no Organizasaun Komunitaria, Filomeno Cardoso, agradese ba Plataforma Nasional Be Saneamentu Ijiene Timor-Leste (PN-BESI-TL) ne’ebé implementa ona programa iha Munisipiu Covalima liliu atu garantia fornesementu be ba komunidade.
“Ohin mai partisipa enkontru ida konaba Plataforma Nasional Be Saneamentu Ijiene Timor-Leste (PN-BESI-TL) ne’ebé hamahan an iha gabinete apoiu sosiedade sivil, sira naia programa hirak ne’e mai alvu liu iha Munisipiu Covalima, Postu Fohorem, Suku Dato Tolu no Fohorem sira hare liu ba be saneamentu no ijiene nian iha suku rua refere” nia dehan.
Atividade ne’e hala’o iha salaun enkontru Postu Administrativu Suai, ne’ebé partisipa husi Sekretariu Munisipal Asuntu Sosiais no Organizasaun Komunitaria, Diretor Be Timor-Leste, Empreza Publiku Munisipiu Covalima, inklui sosiedade sivil sira ne’ebé iha Munisipiu Covalima, Engkuantu tema ba enkontru preliminaria ne’e maka “asaun sidadaun nian hodi haforsa servisu fornesimentu setor be no saneamentu iha area rural (Boa Governasaun) liu husi Kartau Pontuasaun Komunidade (KPK).
Jornalista : Julio Salinas
Editor : Chamot Nahac
