Covalima (RCCT) 02-06-25-Sekretariu Estadu Dezenvolvimentu Lokal (SEDL) Mateus dos Santos Talo hatete planu ordenamentu territorial hanesan politika importante nonu governo ninian liga ba desentralizasaun no poder lokal hodi bele garantia desenvolvimentu ida ne’ebé harmonia, seguru no ekilibru.
Mateus Talo dehan lia ne’e hafoin akompaña Ministru Planeamentu Investimentu Estratejiku (MPIE), Gestão Francisco de Sousa, halo abertura Ofisial ba Planu Munisipal Ordenamentu Territoriu (PMOT) Munisipiu Covalima.
“Planu Ordenamentu Territorial ne’e importante tebes liga ho politika nonu governo ninian liliu ba desentralizasaun no poder lokal. Ita b’oot sira hatene Ministru Administrasaun Estatal hanesan departamentu governamental ida ne’ebé toma konta ba poder lokal desentralizasaun administrative, desenvolvimentu komunitariu no mos promosaun ba desenvolvimentu lokal no bele garante dezenvolvimantu ida ne’ebé harmonia no sustentavel no mos asegura utilizasaun rai no espasu ne’ebé ekilibru” SEDL dehan.
Governante ne’e nafatin husu parte relenvantes sira persiza tau matan ba dezenvolvmentu infraestrura liliu iha area rural nia konektividade mai Postu no Munisipiu, basa ida ne’e sai hanesan indikador ba kondisaun minimu husi munisipiu atu priense eleisaun ba kamra munisipal.
“Iha buat barak presija ita hare no tau matan liuliu ba setor infraestrutura Covalima, iha Postu hitu(7) ne’ebé ho nia area sira ba foho ne’ebé risku tebes ba inundasaun, ha’u hanoin ida ne’e oinsa mos ita atu hare ba eventu sira ba setor produtivu sira liuliu ba agrikultura liliu iha parte Maukatar, Fatululik, Fatumea no mos Fohorem. Infraestrutura importante tebes tanba iha faze de avaliasaun kondisaun minimal munisipiu ida atu priense ba eleisaun kambra Munisipal, infraestrutura bazika sai indikador ida importante para oinsa konektividade ita ninia povu, iha suku mai postu, postu mai munisipiu.” Nia dehan.
Abertura ofisial ba Planu Munisipal Ordenamentu Territoriu (PMOT) Munisipiu Covalima ne’e partisipa maximu husi Ministru Planeamentu Investimentu Estratejiku (MPIE), Sekretáriu Estadu Dezenvolvimentu Lokal (SEDL), Diretór Jeral Ordenamentu do Territoriu, Prezidente Autoridade Munisipiu (PAM) Covalima no mos Sekretariu Munisipal Administrasaun Finansas, Sekretariu Munisipal Planeamentu, Investimentu Dezenvolvimentu Integradu, Sekretariu Munisipal Asuntu Sosiais no Organizasaun Komunitaria, Prezidente CCLN Munisipiu Covalima, inklui Autoridade Postu Administrativu hitu.
Jornalista : Alfredo Barreto
Editor : Chamot Nahac
