Covalima (RCCT)-06-04-2021 Relasiona ho udan no anin bo’ot iha semana kotuk, hodi hamosu inundasaun hodi fo impaktu ba produto lokal dodok iha to’os laran iha Suco Lalawa Aldeia Ai-oan, Postu Administrativu Tilomar, Municipio Covalima.
Xefe Aldeia Ai-Oan Manuel Amaral hateten Batar hektar 8 no modo hektar 2 no pateka hektar 2, no Fore tali hektar 1, maka hetan estragus husi inundasaun nebe mosu impaktu husi Udan no anin bo’ot iha semana kotuk,
Tanba ne’e xefe Aldeia Manuel dehan ekipa tekniku husi Ministerio Agrikultura e Pesca iha Covalima foti ona dadus ba akontesimento hirak ne’e.
” Udan no anin bot iha Semana kotuk, ami nia produto lokal iha Aldeia Ai-oan ne’e barak maka hetan estraga husi Mota nebe maka tama liu mai ami nia to’os laran, Ami nia batar hektar 8, Fore tali 1 no pateka hektar 2 resin inklui modo hektar 2 estraga hotu kedas, maibe ekipa Tekniku husi Ministerio Agrikultor e Pesca iha Covalima foti ona dadus ba ami nia produto lokal ne’ebe maka hetan estragus husi inundasaun “ Xefe Aldeia Ai-Oan Manuel Amaral Esplika, Segunda (05-04)
Ho nune’e Xefe Aldeia ne’e sente triste tanbadurante ne’e komunidade sira la hetan rendimento nebe maka di’ak husi sira nia produto lokal depois mosu tan inundasaun nebe mak afeita ba produtu lokal komunidade nian straga hotu iha to’os laran.
” Hau hanesan Xefe Aldeia senti triste tanba ha’u nia komunidade sira la hetan rendimentu nebe maka di’ak husi sira nia produto lokal tamba udan estraga hotu “ Sefe Aldeia Ai-oan ne Salienta.
Iha sorin seluk Joanino Amaral hanesan to’os nain nia sente triste maibe nafatin simu ho konsekuensia ba akontesimentu ne’e, no sei la halakon vontade atu nafatin servisu nudar ema agrikultor.
“nudar to’os na’in tenke simu resiko nebe ami hetan, no ami nudar to’os na’in labele halakon vontade atu servisu, ami nafatin servisu tanba ami nia servisu maka halo to’os ne’e ona, la iha servisu seluk, di’ak ba ami maka servisu agrikultura ne’e “ Dehan to’os Joanino.
Entertanto tuir informasaun husi Xefe Aldeia Ai-Oan katak, Iha Aldeia Ai-Oan komunidade Uma kain 14 maka afeita ba inundasaun iha Aldeia Ai-Oan Suku Lalawa, Postu Administrativu Tilomar, Municipio Covalima.
Jornalista : Tynho Gusmão
Editor : Chamot Nahac
