Covalima (RCCT) 06-06-25-Prezidente Autoridade Munisipiu (PAM) Covalima, Miguel Armada Cardoso “Razao” husu ba Administrador Postu Administrativu Suai, no Xefe Suku, Xefe Aldeia inklui Ofisial Polisia Suku (OPS) iha Beko atu identifika didi’ak komunidade sira ne’ebé iha duni inisitiva hakarak hala’o atividade negosiu hodi bele fo oportunidade utiliza kuartu ida husi kuartu 20 iha uma merkadu Beko hodi faan Sira Nia sasan.
Autoridade ne’e sekunda hodi fo xamada ba lideransa komunitaria sira labele hili deit familia maibe tenki identifika ho onestidade no real ba ema sira ne’ebé badinas duni atu atu halo negosiu iha merkadu.
“OPS no APA Suai bele hatene tuir, mais iha area ida ne’e Xefe suku ho xefe aldeia maka tenke identifika, labele dehan aldeia ida deit, tenke aldeia hotu, identifika sira ne’ebé maka ninia hobi ne’e halo prosesu negosiu hakarak la’o, entaun fo ba sira, Ita la bele dehan katak xefe suku ne’e husi ne’eba, ne’ebe xefe suku nia familia deit, ne’e labele akontese, hotu-hotu involve, maibe ida ne’ebé hakarak buka moris iha merkadu ne’e” PAM Husu.
Xefe Suku Beko Alindo Bernadino Lemos, dehan nia parte sei servisu hamutuk ho Servisu Munisipal Jestaun merkadu, Administrador Postu Administrativu (APA) Suai no xefe aldeia sira hodi fihir didiak ema ne’ebé maka atu bele uza uma no kuartu iha merkadu Beko.
“Ba oin Jestaun merkadu ho lideransa komunitaria sei buka meus ida oinsa maka Ita bele hetan ema ne’ebé atu bele utiliza merkadu ida ne’e, maibe ida ne’e sei hein tan tempu semana ida ka rua ami sei hamutuk ho jestaun merkadu mobiliza komunidade ka negosiante sira para oinsa sira bele mai hamutuk iha ne’e, se maka bele hetan kuartu sira ne’e hodi utiliza fatin ne’ebé governu prepara ona” nia dehan.
Engkuantu persija halo identifikasaun didi’ak ba komunidade sira molok fahe kuartu 20 husi uma ida merkadu Beko, basa ho razaun fundament aida katak iha futuru labele mosu problema entre komunidade negosiante sira. Tanba ne’e maka PAM Covalima husu ba Xefe Suku no Xefe Aldeia atu indetifika ho balansu no labele hamosu pratika familarizmu iha prosesu idetifikasaun ne’e.
Jornalista : Julio Salinas
Editor : Chamot Nahac
