Covalima (RCCT) 08-01-25-Prezidente Autoridade Munisipiu Covalima, kestiona maka’as kona-ba extensionista Agrikultur tanba tuir nia observasaun iha terenu durante fulan 10 nia laran extensionista sira hala’os servisu la masimu tanba sei rai produtivu barak mak bele utiliza ba atividade arkultur sei abandona iha Covalima.
Maske nune’e,Prezidente Autoridade Munisipiu Covalima, Miguel Armada Cardoso “Razão” nafatin fo apresiasaun ba extensionista sira nia servisu maske iha sorin seluk nia dehan extensionista sira ladun eduka komunidade agrikultur sira atu bele iha mentalidade badinas.
“Simu pose iha fulan Marsu 2024, hare ba ita nia observasaun, apresiasaun mos ba sira, maibe iha fatin balu demoplot iha mais iha fatin balu laiha, tanba ida ne’e maka PAM nudar autoridade masimu ida iha munisipiu tenke iha planu ida hodi hare sira nia servisu, hodi observa sira nia servisu bainhira extensionista sira nia servisu la la’o PAM iha obrigatoriomente hodi halo jestaun no haka’as sira halo servisu, la’os simu tiha osan depois lori toba deit iha uma no la halo servisu no la eduka tan ita nia komunidade liliu agrikultor sira, katak sira eduka ona automatikamente ba oin komunidade bele ses husi mentalidade ida baruk ten ne’e, se bainhira ita eduka naton no kontrola husi diretór agrikultura no mos PAM rasik sei kontrola sira” informa PAM Miguel Armada Cardoso “Razão ba jornalista sira hafoin remata konvoka reuniaun ho funsionariu agrikultura sira ne’ebe hala’o iha Salaun enkontru Administrasaun Munisipiu Covalima Kuarta (08/01).
Maske nune’e, Diretór Servisu Munisipal Agrikultura Munisipiu Covalima, Lino Magno, relata kona-ba total extensionista iha Munisipiu Covalima hamutuk ema na’in-30 ne’ebé destaka kada Suku ema na’in, durante ne’e hasoru problema laiha transporte ba sira hodi hala’o servisu iha terenu.
“Munisipiu Covalima kompostu husi suku 30, tanba ne’e iha extensionista hamutuk ema na’in-30 hodi destaka iha ne’eba, kada suku ema na’in ida, sira ne’e prersija transporte, tanba uza transporte maka hodi hala’o servisu ba agrikultor ninian, ne’ebé ida ne’e ita sei presija duni motorizada unidade 30, no planu sosa motorizada labele hato’o ba iha Ministeriu Agrikultura, maibe agrikultura munisipiu ne’e iha PAM nia okos tan ne’e maka ita aprezenta proposta ba iha PAM, ita labele dehan katak sira la servisu no sira servisu maka’as mos lae, maibe tanba bazeia ba sira nia servisu ne’e maka ita hare produsaun ne’e mos ita nia tarjetu hakarak minimal ne’e tonelada 4 kada hektares, maibe iha agora daudaun 2,5 toneladas ne’e tanba iha failansu balu mos mosu iha baze, tan ne’e ikus mai nia rezultadu hanesan ne’e la problema maibe ita hanesan dirijente ida hakarak servisu ba nasaun ida ne’e prontu” Lino dehan.
Maibe PAM Covalima nafatin husu ba Diretór Servisu Munisipal Agrikultura no funsionariu tomak liliu extensionista sira atu tun ba iha terenu, hodi servisu hamutuk ho agrikultor sira ne’ebé halo to’os no natar nune’e bele hasa’e produsaun rai laran hodi redus numeru importasaun foos husi rai liur.
Jornalista : Julio Salinas
Editor : Chamot Nahac
