Covalima (RCCT) 14-05-21 Vise-Ministro da Administrasaun Estatal (MAE) hamutuk ho Administrador Municipio Covalima halo enkontru ho Xefe Suco 30 iha Municipio Covalima inklui Administrador Posto Administrativo 7, hodi forma ekípa taksforce no linha frente iha nivel Suco.
Iha Nia deskursu Administrador Munisipio Covalima Francisco de Andrade hateten, Engkontru Vise-Ministro ho Xefe Suco 30 no Administrador Posto no Municipio, tanba Orientasaun husi MAE katak, atu forma ekípa taskforce no Linha Frente ba Covid-19 hahu kedas husi nivel Suco to’o Municipio.
“Ohin loron ita mai iha ne’e, tanba iha orientasaun ida husi Ministério katak, atu forma ekípa linha frente ne’e husi kedas Suco mai to’o Municipio, uluk ita forma deit ekípa taskforce iha Municipio, maibe agora lae ona ” Dehan Francisco de Andrade.
Administrador ne’e mos informa, dadaun ne’e iha Municipio Covalima iha ona Cluster 6 maka deteta ba positivo Covid-19, tanba ne’e nia husu ba Xefe Suco no Administrador Posto sira atu kontribui hamutuk hodi luta, oinsa bele ultrapassa situasaun ida ne’e.
“Agora dadauk iha Covalima ne’e iha ona Cluster 6, hanesan iha Merkado Suai, Prijaun, Leogore, komando UPF, nsst, tanba ne’e ha’u husu ba ita hotu atu kontribui maka’as, oinsa maka ita bele ultrapassa iha situasaun ida ne’e ” Administrador Munisipio hatutan.
Iha Fatin ne’e, Vise-Ministro da Administrasaun Estatal (MAE) Lino de Jesus Torrezão iha nia diskursu ba engkotru ne’e mos husu ba Xefe Suco no Administrador Posto inklui Administrador Muncipio Covalima, obrigatorio atu simu vasina, Governante ne’e mos husu ba Administrador Municipio Covalima atu toma atensaun ba sira nebe maka la simu vasina, maka sei impaktu ba sira nia insentivo.
“ Hau hatene Xefe Suco balu tauk atu vasina, Sekuando Xefe Suco ou Administrador posto maka la simu vasina, sira nia salario ne’e tenke tahan, Administrador Municipio mos hanesan, se karik ita bo’ot nia komponente sira maka la simu vasina, haruka sira labele tama servisu depois ko’a sira nia saláriu ” Governante ne’e esplika iha nia Diskursu.
Entertanto Governante ne’e enkoraja ba Xefe Suco sira, atu kopera hamutuk ho parte Saúde, hodi halo sosializasaun tama Aldeia sira, oinsa komunidade sira bele kontribui hodi luta hasoru virus ida ne’e liu husi simu Vasina, tanba komunidade balu tauk atu simu vasinasaun ne’e.
Jornalísta : Tynho Gusmão
Editór : Chamot Nahac
