Covalima (RCCT) 26-08-25- Ministru Asuntu Kombatentes Libertasaun Nasional (MAKLN) hateten labele kahur asuntu veteran ho politika hodi faborese ba halakon valor luta ba libertasan nasional.
Gil da Costa Monteiro “Oan Soro” dehan kobantentes sira hotu iha dever atu kotribui ba dezenvlvimentu no estabilidade nasional hodi kontinua asegura naran di’ak b aluta libertasaun nasional.
“Hare ba Asuntu Veteranus labele kahur ho politika.Kuandu ita kahur ho politika mak ita sei faborese no dada dalan ba ema seluk ne’ebé maka uluk lakohi ukun an sei mai sobu ita ida idak no ikus mai valor luta ba libertasaun nasional ne’e sei lakon iha Timor Leste.” Oan Soro dehan.
Tan ne’e Gil Oan Soro husu ba veteran sira tenki disiplinadu no sai ezemplu ba jeresaun foun sira hodi bele senti unidade lutador sira nian ne’ebé hatur iha tempu pasadu.
“Veteranu sira tenki disiplinadu, atu nune’e ita nia oan no jerasaun sira bele senti unidade tempu pasadu no bele senti ita nia disiplina iha kolker atividade, labele fo dalan ba ema ne’ebé la gosta ida atu infiltra tama hodi politiza ka fasilita ita fahe malu” Ministru Asuntu Kombatentes Libertasaun Nasional (MAKLN) Gil da Costa Monteiro “Oan Soro” fundamenta.
Governante ne’e dehan Veteranu la’os naran apelidu ema nian, maibe ida hanesan responsabilidade, tan ne’e maka previstu ona iha estate kobatente libertasaun nasional nian katak veteranu ida idak iha dever atu kontribui ba dezenvolvimentu no mos estabilidade nasional.
Jornalista : Gabriel da Silva Amaral
Editor : Chamot Nahac
