Covalima (RCCT), 27-08-2026 — Marie Stopes International Timor-Leste (MSI TL), hamutuk ho Servisu Munisipál Saúde (SMS) Covalima, realiza atividade Enkontru Advokasia Saúde Reprodutiva Integradu, ho objetivu atu haforsa sistema saúde nasionál, liuliu iha área saúde materna no infantil, saúde reprodutiva no planeamentu familiar.
Atividade ne’e mos iha objetivu atu asegura kualidade, disponibilidade no asesibilidade ba servisu saúde iha komunidade.
Diretora-Jerál Kuidadu Saúde Primáriu, Elizabeth Leto Mau, iha nia diskursu hatete katak advokasia saúde reprodutiva integradu la’ós ko’alia de’it kona-ba planeamentu familiar, maibé envolve mos servisu saúde seluk, hanesan konsulta ba inan isin-rua (Antenatal Care – ANC), partu seguru, asisténsia pós-partu no komunidade livre husi droga (Drug-Free Community – DFC).
“Advokasia ba ohin loron ne’e, primeiru, hau hakarak ko’alia katak bainhira ita ko’alia kona-ba saúde reprodutiva integradu, liafuan ‘integradu’ signifika katak ita ko’alia kona-ba asuntu lubuk ida ne’ebé iha ligasaun ho saúde materna no infantil, la’ós planeamentu familiar de’it. Segundu, ita tenke ko’alia mos kona-ba ANC, partu seguru, asisténsia pós-partu no DFC. Ita ko’alia mos kona-ba saúde reprodutiva rasik, no ita tenke habelar informasaun ba eskola no juventude sira, tanba iha ligasaun ho planeamentu familiar,” Elizabeth Leto Mau, hatete.
Enkuantu ne’e, Diretora Marie Stopes International Timor-Leste (MSI TL), Maria Amelia Barreto, informa katak organizasaun ne’e hetan apoiu husi Governu Austrália no Governu Nova Zelándia atu ajuda hadia no haforsa sistema saúde, inklui asegura kualidade, disponibilidade no inklusividade ba servisu saúde iha Munisipiu Covalima.
“MSI TL, ho suporta husi Governu Austrália no Nova Zelándia iha Munisipiu Covalima, sente orgullu tebes bainhira iha atividade sira atu hadia no haforsa sistema saúde, atu asegura kualidade, disponibilidade no inklusividade husi servisu sira ne’e, liuliu iha eventu hanesan agora,” Maria Amelia Barreto, informa.
Iha parte seluk, Diretor Interinu Servisu Munisipál Saúde (SMS) Covalima, Teofilho Amaral, hato’o apresiasaun ba MSI TL nia prezensa no apoiu ne’ebé fó ona ba Servisu Munisipál Saúde Covalima.
“Agradese husi parte Saúde Munisipiu tanba ita boot sira nia prezensa bele kontribui hodi bele hadia ami nia servisu sira. Karik durante ne’e balu ami seidauk to’o iha nível ne’ebé ita hakarak, ita boot sira nia prezensa iha loron hirak ne’e sai xave importante atu ajuda hadia ami nia prestasaun servisu sira hotu,” Teofilho Amaral, hato’o.
Enkontru Advokasia Saúde Reprodutiva Integradu ne’e hetan partisipasaun husi reprezentante relijiozu sira, juventude no pesoál saúde husi sentru saúde iha Postu Administrativu neen (6) iha Munisipiu Covalima.
Jornalista: Julião Correia
Editor: Paul Mandeu
