Covalima (RCCT) 09-10-24-Ministeriu Saude (MS) sosializa informasaun konaba konsultasaun no estabelesimentu ba Monitorizasaun Baze Komunidade Suku (MBKS) tuir Planu Origrama governu nia ne’ebé hakarak hakbesik liu saude ba Komunidade iha Suku Kamenasa Postu Administrativu Suai.
Ba jornalista sira Xefe Departamentu Edukasaun no Promosaun Saude Ministerio Saude, Filomeno Pinto Moniz, informa, Programa Monitorizasaun Baze Komunidade Suku (MBKS, realiza no hetan ona susesu uluk ona iha Postu Administrativu Tilomar, tinan rua liu ba, tan ne’e governu liu husi ministeriu saude kontinua fali tinan ne’e iha Postu Administrative Suai.
“Objetivu ba ohin loron nia ita mai iha Suku Kamanasa, hala’o programa ida hanaran Monitorizasaun Base Komunidade Suku (MBKS), ita nia programa ida ne’e antes ne’e hala’o ona ne’ebé suporta husi ajensia internasional balu ne’ebé hala’o iha tinan rua liu ba iha Postu Administrativu Tilomar, Ita hakarak programa ida ne’e kontinua nafatin maka Ministeriu Saude nafatin tau importansia ba programa ida ne’e hanesan programa indikadores ida ba MS nian ne’ebé agora daudaun ami mai iha Covalima hala’o iha Suku Kamanasa no suku rua seluk iha Postu Administrativu Suai, tanba antes ne’e ita hala’o iha Tilomar ita hetan susesu, tan ne’e maka agora mai atu mobiliza fila fali ka sensibiliza informasaun ne’e ba komunidade no autoridade sira iha nivel suku, programa ida ne’e hakarak atu hala’o iha suku sira hotu ne’ebé postu saude sira iha, tanba ita hakarak ita nia komunidade sira sai na’in ba problema ne’ebé sira relata mai ita nia pesoal saude sira ne’ebé besik ba sira hodi hare problema hirak ne’e no ita bele buka resolve hirak ne’e no hasa’e ita nia atinjimentu indikadores sira ne’ebé Ministeriu Saude sira iha ba” informa Xefe Departamentu Edukasaun no Promosaun iha Saude Ministeriu Saude, Filomeno Pinto Moniz.
Administrador Postu Administrativu (APA) Suai, Ildefonso Maria Amaral, iha nia intervensaun enkoraza komunidade sira atu bele intende hodi asesu ba asuntu empoderamentu saude ne’ebé di’ak iha Sosiedade nia let.
“Monitorizasaun Baze Komunidade Suku (MBKS) atu empodere komunidade hodi identifika no responde ba asuntu saude no hadi’a komunidade sira nia saude rasik, ida ne’e maka ita hamutuk hanesan autoridade enkoraza partisipante sira hotu oinsa atu bele intende no komprende didi’ak no hau hau hanoin ba futuru bele implementa ho di’ak liu tan” APA informa.
Programa Monitorizasaun Baze Komunidade Suku (MBKS) iha Postu Administrativu Tilomar suai ne’e hala’o iha Sede Suku Kamanasa.
Jornalista : Julio Salinas
Editor : Chamot Nahac
