COVALIMA—-Ministeriu Saude Kinta (12/01) feira ne’e hala’o lansamentu kampaña nasional integradu imunizasaun rutina, introdusaun vasina PCV, Vitamins A, Aimoruk kontra lumbriga no imunizasaun Covid-19.

Diretór Nasionàl Orsamentu no Jestaun Finansas Ministériu Saúde, Miguel Maria, dehan Timor-Leste foin atravesa situasaun pandemia boot ida iha tinan ida ka rua liu ba halo vasina rutina ne’e kuaze paradu tanba ne’e ohin foin bele hahu fali hodi halo vasina ba labarik sira husi tinan 5 mai kraik.

“Ita foin atravesa situasaun pandemia boot ida iha ita nia nasaun iha tinan rua kotuk ba, ita nia servisu vasina rutina kuaze paradu, entaun iha nasaun sudeste Aziatiku ne’e ita nia atinjementu ba vasina rutina ne’e menus tebes, iha ona kazu ida ka rua hatudu ona katak kuandu ita la halo esforsu vasina rutina hodi hasa’e kobertura surtu kazu ida ne’e sei mosu ba oan sira” informa Diretór Nasionàl Orsamentu no Jestaun Finansas Ministériu Saúde, Miguel Maria, ba jornalista hafoin halo lansamentu kampaña nasional integradu imunizasaun rutina ba labarik sira iha Aldeia Asumaten, Suku Debos, Postu Administrativu Suai.

Nia dehan ho kampaña nasional ida ne’e hodi duni fali atinjementu ne’ebe paradu iha tinan rua kotuk ne’e atu nune’e oan sira labele hetan moras nia objetivu prinsipal mak ida ne’e.

Nia dehan ho pandemia ne’ebe iha hatudu tan vasina covid-19 iha tinan rua kotuk ba hakarak atu integra iha vasina rutina, tanba ne’e mak ho objetivu lansa kampaña ida ne’e katak vasina ba oin ne’e bainhira oan sira moris tenke simu vasina hotu kedas hodi prevene moras at sira.

Importante ba oan sira vasina ne’e importante tebes, tanba liu husi vasina maka bele hasae labarik sira nia imunidade ne’ebe diak.

Tanba moras sira hanesan sarampu, rubella no polio ne’e mai husi virus ne’ebe laiha aimoruk atu bele hodi halo tratamentu, maibe aimoruk uniku maka dalan ida liu vasina, atu protje virus ida ne’e tenke proteze liu husi laran labele liu husi liur.

Xefe Suku Debos Agustinho da Silva, satisfas ho kampaña nasional nasional ida tanba sira husi saude rasik tun direita ba iha komunidade nia let hodi hala’o kampaña imunizasaun ba labarik sira.

“Hau nudar lider komunitaria ida sente kontente bainhira sira husi saude rasik halo lansamentu kampaña vasinasaun iha hau nia aldeia rasik, programa ida ne’e realiza tanba husi saude ami servisu hamutuk halo micro planu mak ohin akontese lansamentu vasinasaun ida ne’e iha Suku Debos” informa xefe Suku.

Tuir xefe suku katak vasina ida ne’e importante tebes liliu ba labarik sira ho idade tinan 5 mai kraik, ne’ebe bainhira trasa planu ba labarik sira ne’ebe tinan 5 mai kraik ne’e importante tebes ba sira nia saude, atu asegura sira nia saude no hasae sira nia imunidade.

Xefe suku husu ba nia komunidade liliu ba inan aman sira atu lori sira nia oan hakbesik ba iha fasilidade saude hodi simu vasina tanba liu husi vasuna maka bele hasae imunidade labarik sira nian no bele prevene husi moras sira hanesan sarampu, rubella, polio no moras sira seluk.(Azu)