Covalima (RCCT) 24-06-25-Segunda ne’e Ministeriu Planeamentu Investimentu no Estratejiku (MPIE), hala’o diskusaun ho Autoridade Postu Suai konaba Planu Munisipal Ordenamentu Teritoriu (PMOT).
Pontu Fokal Planu Munisipal Ordenamentu Teritoriu (PMOT) ba Munisipiu Covalima, Fernando Ronaldo da Costa, esplika katak iha atividade atu halo diskusaun konaba sosiu ekonomia, kultura, infraestrutura, saude, edukasaun, bee mos.
“Bazeia ba dokumentus ne’ebé iha ita sei fo formasaun katak iha ne’eba, iha dokumentus rua, dokumentus ba planu nian no mos dokumentus komplementar ba planu, no dokumentus planu nian maka sei mai kedas ho nia planta kondisenante ne’e maka sei identifika fatin sira ne’ebé ita bele dehan vokasaun ba iha agrikultura, vokasaun ba iha turismu nian no ba iha sira seluk tan, ba iha planta kondisenante ne’e nia hanesan tau bandu ida mai iha planta ne’e rasik, nia sei identifika fatin ne’ebé risku ezemplu hanesan agrikultura ita sei labele konstrui uma ruma iha ne’eba, tanba nia mai kedas ho regulamentu ne’ebé kria ba iha planta rua ne’e” Pontu Fokal Planu Munisipal Ordenamentu Teritoriu (PMOT) ba Munisipiu Covalima, Fernando Ronaldo da Costa, informa ba jornalista sira iha salaun Administrasaun Postu Administrativu Suai, Segunda (23/06).
Administrador Postu Administrativu (APA) Suai, Ildefonso Maria Amaral, haktuir reuniaun ida ne’e foka liu ba iha diskusaun grupu tuir formatu ne’ebé konsultan sira prepara ona.
“Iha semana kotuk ita lansa ona planu munisipal ordenamentu teritoriu husi Ministeriu Planeamentu Investimentu no Estratejiku (MPIE), no ohin loron ami hamutuk ho diresaun nasional ordenamentu emparsial ho mos konsultansira ne’ebé mai husi Indonezia hala’o reuniaun ka enkontru iha Postu Administrativu Suai, ami foka liu ba iha diskusaun grupu ne’ebé sei diskusi klean liu tuir formatu ne’ebé ita nia konsultan sira prepara ona hanesan hare ba iha parte sosiu ekonomia, kultura, infraestrutura, saude, edukasaun, bee mos ho ida ne’e maka ita hala’o enkontru ida ne’e hamutuk ho sektorais sira iha nivel postu ho lider komunitaria sira atu nune’e bele fo informasaun ida ne’ebé detallu konaba kondisaun iha ida-idak nia suku” informa APA Suai.
Atividade diskusaun konaba Planu Munisipal Ordenamentu Teritoriu (PMOT) hahu uluk iha Postu Administrativu Suai, no mos sei kontinua ba postu administrativu sira seluk ne’ebé partense iha Covalima.
Jornalista : Julio Salinas
Editor : Chamot Nahac
