COVALIMA—Ministériu Obras Públika (MOP), sei monta bareira iha ponte Lomea ne’ebe iha tempu udan monu rai, korente mota maka’as sempre sobu ponte hodi difikulta movimentu transporte no komunidade sira lori produtu asesu ba merkadu.
“Itasei monta bareira no agora kompaña sei halo produsaun ho todan tonelada 8 to’o 9, ita sei tau barak iha ne’eba, hodi reforsa bainhira tempu-udan korenti mota bo’ot, nune’e ita desvia mota atu labele sobu ” informa Ministru Obras Públika (MOP) Abel da Silva Pires, ba jornalista sira iha suku Holpilat sesta (13/01).
Nia dehan, tinan ne’e monta bareira, tanba agora kompaña halo hela produsaun no halo dezeñu atu monta iha parte ne’ebé no presija mós tender nune’e kompaña bele monta.
“Ponte Lomea la presija proposta mos ita sei haree tanba tempu udan ponte regere sempre kotu no Institutu Gestaun Ekipamentu (IGE-sigla Portugés) sempre halo normalizaun la konsege rezolve tanba fatuk de’it makina labele konsege rezolve lori rai henek taka udan fasil atu lori” nia dehan.
Antes ne’e autoridade no komuniade sira preokupa, tanba Ponte Lomea ne’ebé lokaliza Suku Tashilin postu administrativu zumalai sempre ameasadu atu kotu.
Diretór Servisu Munisipal Obras Públika (MOP) Covalima, Albeto Cardoso mós hato’o ona proposta ba Institutu Gestaun Ekipamentu (IGE-sigla Portugés) halo normalizasaun, maibé la konsege rezolve, maibé bainhira tempu udan ponte refere kontinua ameasadu atu kotu.(Azu)
