Covalima (RCCT) 18-07-24-Ministeriu Obras Publika (MOP) liu husi Diresaun Nasional Planeamentu Peskiza no Dezenvolvimentu (DNPPD), hala’o formasaun ba engineriu na’in-44 mai husi munisipiu-4 mak hanesan Munisipiu Aileu, Ainaro Covalima no Manufahi, durante loron tolu konaba oinsa atu uza Global Positioning System (GPS) bainhira tun ba iha terenu hodi foti dadus.
Xefe Departamentu Base de Dadus Diresaun Nasional Planeamentu Peskiza no Dezenvolvimentu (DNPPD), Engineriu, Ricardo Januario D.J. Borges, hatete formasaun loron tolu ne’e oinsa atu hasa’e kapasidade no abilidade engineriu sira nian.
“Objetivu ba treinamentu ida ne’e atu fo konesimentu ho hasa’e kapasidade no abilidade liliu ba engineriu iha area munisipiu sira liuliu hanesan Munisipiu Aileu, Ainaro, Covalima no Manufahi, no husi treinamentu ida ne’e atu aumenta kapasidade ba engineriu sira liliu ba sira husi munisipiu ne’e rasik hodi nune’e sira bele foti ka rekolla dadus ba estrada, ponte, Cheias no sira seluk ne’ebé ligadu ho tekniku nian, total partisipante enguneriu sira iha ne’e hamutuk ema na’in-44 inklui husi PDIM no obras publik” informa Xefe Departamentu Base de Dadus Diresaun Nasional Planeamentu Peskiza no Dezenvolvimentu (DNPPD), Engineriu Ricardo Januario D.J. Borges, ba jornalista sira hafoin treinamentu durante loron-3 ba engineriu sira iha Salaun Administrasaun Postu Administrativu Suai, Kinta (18/07).
Partisipante iha formasaun ne’e Teknika Supervisor Diresaun Geral Estrada Ponte Prevensaun Kontrolu Cheias (DGEPPCC) Aileu, Engineria Rosita Antonia da Silva Pires, apresia tanba liu husi formasaun ida ne’e oinsa enegineriu sira hotu bele uza GPS bainhira tun ba iha terenu hodi hala’o servisu liliu foti dadu kona ba ponte, estrada no seluk tan.
“Iha formasaun ne’e ami hetan konaba oinsa atu utiliza kona ba GPS, depois oinsa uza GPS atu halo checking ba estrada sira ne’e no oinsa atu tau pontu ba iha edifisiu sira ne’e, no oinsa ami mos bele halo sukat area iha fatin ruma, antes ne’e mos ami hetan ona treinamentu kona ba GPS ne’e, maibe tanba kle’u ona tan ne’e ami presija fali refresh treining no husi ida ne’e ami sei dauk hatene dala ruma ami ba survey uza telefoni de’it la dun uza GPS maibe liu husi treinamentu hanesan ne’e ona bainhira ami fila ba bele uza ona GPS hodi rekolla dadus sira liliu kona ba ponte, estrada no seluk tan” nia dehan.
Enkuantu partisipante sira ne’e maioria engineriu hotu hamutuk ema na’in-44 mai husi munisipiu-4 hanesan Munisipiu Aileu, Ainaro, Covalima no Manufahi, no treinamentu ne’e hala’o iha salaun Administrasaun Postu Administativu Suai, Munisipiu Covalima, no treinamentu ida ne’e hala’o durante loron-3 hahu iha loron tersa no remata Kinta feira ohin.
Jornalista : Julio Salinas
Editor : Chamot Nahac
