Covalima (RCCT) 06-10-23–Ministru Interior (MI) Francisco Guterres Sexta foin lalais ne’e hala’o vizita traballu iha Covalima hodi observa direta konaba kondisaun Servisu Unidade Patrumentu Fronteira (UPF) hodi asegura frenteira rai maran entre Timor-Leste no Indonezia espesial Munsipiu Covalima liu liu Fatumea ne’ebe baliza ho Atambua Indonesia.

MI Francisco Guterres hatete liu husi vizita iha Postu Siguransa UPF atu fo korazen ba membru UPF sira bele hala’o servisu ho di’ak liu tan, no vizita ida ne’e atu hare haree direita no idetifika kondisaun iha postu siguransa UPF nune’e governu bele hadi’a iha Futuru.

“Ho vizita ida ne’e ita mai atu enkoraza sira halo sevisu, katak governu iha hela atensaun ba sira, husu sira servisu nafatin, pelumenus ita mai haree sira fo korazen no fo forsa ida ba sira bele halo servisu nafatin, ita mos mai haree kondisaun sira nian, ita haruka sira no ita ejiji sira atu servisu halo didi’ak estadu no governu iha obrigasaun atu tau konsiderasaun tan ne’e mak ha’u lori Komandante Jeral PNTL inklui tekniku sira mai para haree sa kondisaun mak presija governu tau atensaun” informa Ministru Interior Francisco Guterres ba jornalista sira iha Fatumea.

MI kompromete iha planu 2024 sei preve mos orasmentu hodi halo rekrutamentu nune’e bele aumenta rekursu ba numeru UPF iha liña fronteira tanba durante ne’e rekursu limitadu dala ruma iha postu UPF ida iha deit ema na’in-3.

“Ko’alia konaba rekursu, ne’e maka ita sei halo rekrutamentu iha tinan oin, espera katak ita sei aumenta numeru UPF ninian, agora daudaun komando jeral haruka fali sira husi kontinensia jeral ho unidade sira seluk mai reforsa, tan ne’e tinan oin ita halo rekrumentu para bele hodi reforsa UPF pelumenus bele ita tau tan membru UPF 100 hanesan ne’e iha fronteira” nia dehan

Entertantu durante vizita iha Covalima Ministru Interior ne’ebé akompaña husi Komandante Jeral no Komandante PNTL Munisipiu Covalima halo vizita ba iha liña fronteira Fatumea, ne’ebé konsege identifika problema maka durante ne’e membru UPF sira hasoru maka hanesan laiha bee, eletrisidade laiha, kondisaun ba toba fatin “kulsaun” laiha, inklui sei menus rekursu tanba kada postu UPF dala ruma ema na’in-3 deit.