Covalima (RCCT) 15-10-25-Ministeriu Komersiu no Industria (MCI-Sigla Portugues) liu husi Diresaun Nasional Komersiu Externu (DNCE-Sigla Portugues) hamotuk ho Unidade Servisu Deskonsentradu (USDM) MCI Munisipiu Covalima reliza seminariu konaba prosedimentus legais ba exportasaun no importasaun ba exportador produtu sira iha munisipiu Covalima.
Diretóra Unidade Servisu Deskonsentradu MCI, (USDM-MCI) Munisipiu Covalima, Benadete de Jesus Inacia, hatete, seminariu ne’e ko’alia liu konaba exportasaun produtu lokal no produtu ne’ebé mai husi rai liur.
“Atu esklarese konaba atividade ne’ebé ita hala’o ne’e konaba prosedimentu exportasaun no importasaun ba Exportador produtu ne’ebé liga liu ba produtu sira iha Covalima, iha ne’e ita foka liu ba exportasaun no importasaun liu liu ba produtu lokal no mos ba produtu ne’ebé mai husi rai liur.” Diretóra USDM MCI Covalima, Benadete de Jesus Inacia, hatete.
Tekniku DNCE, Alipio Dias esplika katak Iha seminariu ne’e mos ko’alia konaba dekretu lei numeru 30/2011, ne’ebé hetan alterasaun ba Dekelretu lei numeru 64/2022 no diploma ministerial numeru 1/2009, 18 setembru konaba prosedimentu sertifikadu orijem.
“Ida ne’e hodi hamosu inspesaun konjunta entre Alfandega, DNTT ho komersiu hodi hare liu ba kondisaun fiziku ita nia produtu sira ne’ebé tama mai, hanesan kareta no motorizada, konaba produtu nian, ita iha despaixu Primeiru Ministru (PM) iha IV governu nian iha despaixu PM numeru 3/04 hodi fo kompetensia MCI liu husi Deiresaun Nasional Komersiu Externu hodi hala’o atividade ida ne’e.” Alipio, esplika.
Atividade ne’e hala’o iha Salaun Institutu Apoiu Dezenvolvimentu Emprezarial (IADE) Munisipiu Covalima, iha Bairo Rompe, Suku Debos, Postu Administrativu Suai, Munisipiu Covalima, iha ne’ebé Partisipa Masimu husi Emprezaria sira ne’ebé existe iha Covalima.
Reportazen RCCT
