Covalima (RCCT) 19-02-24-Be nudar nesesidade universal ida ne’ebé ema hotu perija iha moris loro loron, maibe iha Timor Leste, partikularmente iha Munisipiu Covalima, Komunidade sira hahu husi Area Urbana to’o Area Rural sira sei kontinua infrenta problema menus Be. Situasaun Maran ne’e falun Eskola Sekundaria Jeral Publika (ESGP) Nutetu Fohorem, obriga manorin sira orienta estudante semana ida tenki lori be jergen ida (5Ltr) husi uma.

Diretór Eskola Sekundaria Jeral Publika Nutetu Fohorem, Raimondo Amaral, esplika hahus kedas iha 2010 estudante lori ona be mai husi uma, ense iha tanki haris fatin, tanba kanalizasauun be mos husi torneira publiku la tama iha eskola.

“Ami orienta estudante sira lori be, tan deit nesesidade ne’ebé ami infrenta iha eskola ida ne’e, atu dehan deit hanesan ne’e lalori be husi uma, maibe kanalizasaun bee mos husi tornera publiku tama mai iha eskola laiha, tanba ida ne’e ami iha eskola profesor ho estudante infrenta hela be, atu atende ami nia problema ba be ne’e, klaru ami tenke orienta ba estudante sira lori be atu nune’e bele enxe tiha iha haris fatin hodi tempu presija karik la’os ba profesor sira deit maka uza maibe ba estudante hotu mos bele uza bainhira presija atu ba haris fatin, problema ne’e iha eskola infrenta kuaze hahu husi tinan 2010 ami uza ona fatin ida ne’e, meus ami uza maka ida ne’e kuandu ami araska be ami tenke avizu ba estudante sira mai husi uma lori be para bele mai fasilita ami iha eskola, tan ne’e ami rekomenda ba governu liliu ba iha Bee Timor-Leste (BTL) koko bele haree mos ami nia preokupasaun nune’e ba tempu oin ami labele preokupa ho ba bee mos hodi labele difikulta ami nia oan estudante sira” deklara Diretór ESGP Nutetu Fohorem, Raymond Amaral ba jornalista sira iha nia kna’arfatin ESGP Nutetu Fohorem Sabadu (17/02).

Estudante ESGP Nutetu Fohorem, Maria Auxiliadora Amaral, hatete kada loron sabadu sai husi uma tenke lori be mai eskola tanba be laiha.

“Ami mai tenke lori be enxe ba sintina ne’ebé maka be laiha, tan ne’e kada loron sabadu ami estudante hotu tenke lori be mai enxe, tanba durante semana ida nia laran ami estudante ho profesor sira uja hotu bee ne’ebe lori, bee iha eskola ne’e araska tanba kanalizasaun mai iha eskola laiha ne’ebe ami presija bee moos tenke lao dook hodi buka bee, tan ne’e husu ba governu atu tau matan hodi dada netik bee ba eskola ida ne’e para ami bele utiliza bee sira ne’e no ami labele lori tan bee husi uma mai eskola, tanba iha eskola ami presija be moos liliu ba sintina ne’ebé importante ba ema hotu iha eskola ida ne’e atu bele uza” nia dehan.

Estudante Paulo Adriano Migi Pereirra, haktuir, husu ba governu atu tau atensaun hodi kanaliza be ba Eskola Jekundaria Jeral Publiku Nutetu Fohorem.

“Lori be husi uma mai eskola tanba iha eskola be laiha, karik ami la lori be, ami tama ba sintina atu lori saida maka hamos foer sira, ami nudar estudante sente triste tanba iha eskola balu estudante sira ba lalori be, ami fali mai eskola lori be, tanba ida ne’e mak ami sente triste, tan ne’e husu ba governu bele tau atensaun hodi liga mos be mai ami nia eskola” nia hatete.

Entertantu total estudante iha Eskola Jekundaria Jeral Publiku Nutetu Fohorem ema na’in 178, maibe dadaun ne’e eskola kontinua estudante simu foun maske prosesu aprendizajen la’o ona. Engkunatu Manorin Na’in iha Eskola Sekundaria Jeral Publiku Nutetu Fohorem hamotuk ema na’in 13.

Jornalista : Julio Salinas

Editor      :Chamot Nahac