Covalima (RCCT) 17-08-2023–Iha nonu governu ne’ebe lidera husi Primeiru Ministru Kay Rala Xanana Gusmão iha ninia programa barak atu atu dezenvolve rai ida ne’e no hadi’a povu nia moris tan ne’e kada ministeriu iha ninia prorama rasik hanesan Ministeriu Administrasaun Estatal iha ninia prorama prioridade-4 atu bele hala’o iha tinan lima nia laran
Iha diskursu Sekretariu Estadu Dezenvolvimentu Lokal Mateus dos Santos Talo, hafoin hala’o dialogu ho autoridade lokal sira iha Covalima Kinta foin lalais ne’e hatete Ministeriu Administrasaun Estatal iha mandatu ba tinan lima nia laran ne’e sei tau prioridade-4 hanesan desentralizasaun administrativa, ordenamentu teritoriu, dezenvolvimentu lokal no dezenvolvimentu urbana.
Nia dehan ho ejistensia Sekretariu estadu lokal iha ambisaun boot sei esforsu maka’as hala’o serbisu durante mandatu tinan lima nia laran, no ba future ne’e munisipiu nia oan sira sei la konsentra hotu iha Dili maibe ida-idak sei fila ba hadi’a ninia munisipiu rasik.
Entertantu Sekretariu Munisipiu Covalima Francisco de Jesus Alves, hatete nudar Covalima oan iha esperansa boot tebes ba Sekretariu Estadu Dezenvolvimentu Lokal iha mandatu ida ne’e husi hahu to’o remata bele lao ho diak hodi servi povu no rai ida ne’e.
Entertantu iha dialogu entre Sekretariu Estadu Dezenvolvimentu Lokal ho autoridade sira iha Covalima hetan partisipasaun masimu husi xefe suku na’in-30, administrador postu administrativu na’in-7, inklui diretor servisu munisipais sira hotu iha Covalima.
Jornalista JS/Baltazar Moniz
Editor CN
