Covalima (RCCT) 15-10-25-Governu liu husi Ministeriu Administrasaun Estatal (MAE) realiza seminariu munisipal ho tema “Hakat ba Desentralizasaun Poder Lokal”. Basa MAE kompretidu atu kontinua implementa politika desentralizasaun nu’udar meius atu hadi’a governasaun no hasa’e prestasaun servisu publiku, hodi hakbiit komunidade Lokal no hakbesik governasaun ba populasaun.
Iha okaziaun ne’e, Diretór Jeral ba Desentralizasaun no Governu Lokal, Antonio Augusto Guterres, hatete katak seminariu ne’e atu partilla no halo reflesaun ba progresu servisu munisipal ida idak, refleta hikas mos dezafiu, no oportunidade husi implementasaun polítika desentralizasaun durante ne’e.
“Objetivu ba seminar ida ne’e, atu partilla servisu munisipal ida idak nian. Kada Servisu Munisipal sei elabora ba relatoriu ida hodi aprezenta ba MAE hodi kontinua ba Primeiru Ministru. No iha 2026 sei tun fila fali ho relatoriu sira ne’ebé ita bo’ot sira aprezenta. Hatuduk tok mai progresu servisu no dezafiu sira ne’ebé ita bo’ot sira infrenta, ita bo’o fo solusaun oinsa ona?.” Diretór Jeral ba Desentralizasaun no Governu Lokal, Antonio Augusto Guterres, dehan.
Iha breve benvindu ba seminariu ne’e, Prezidente Autoridade Munisipiu Covalima, Miguel Armada Cardoso (Razão), Konsidera politika desentralizasaun no poder lokal Importante ba Munisipiu Covalima, basa durante ne’e govenu sentral fo ona kopetensia iha pilar tolu ba Autoridade Covalima, mak hanesan pilar Administrasaun, pilar finansas, pilar Patremonia no lojistiku.
“Ida ne’e Impirtante tebes ba Ita, katak durante tinan naruk ita hein hela. Durante ne’e ita la’o ho buat tolu, mak hanesan administrasaun, Finansas, Patremonia, ida ne’e maki ta ezekuta iha ita nia munisipiu,” Prezidente Autoridade Munisipiu Covalima, relata.
Programa Desentralizasaun Administrativa no Poder Lokal ne’e atu Identifika prioridade estratejiku hodi reforsa kapasidade munisipiu ida idak ba preparasaun avaliasaun kondisaun minimu hodi kaka’at ba instalasaun poder lokal no desentralizasaun administrativa. Ho ida ne’e, Prezidente Autoridade Covalima Miguel Armada Cardoso (Razão) informa katak Prezidente Autoridade mos delega kompetensia servisu balu ba sekretariu munisipal sira atu bele jere hodi dezenvolve Covalima.
Entretantu, Lei Nú. 23/2021 kona-ba Poder Lokal no Desentralizasaun Administrativa no Rezolusaun Governu Nú.6/2025, 10 Fevereiru kona-ba “Exekusaun Estratejia Dessentralizasaun Administrativa no Instalasaun Orgaun Representativu Poder Lokal 2025-2028”.
Seminariu Munisipal ne’e hala’o durante loron rua, hahu iha kuarta feira to’o sexta feira, iha salaun Autoridade Munisipiu Covalima, Iha ne’ebé partisipa masimu husi prezidente Autoridade no Sekretariu Munisipal na’in tolu, funsuinariu kargu xefia, Administrador Postu Administrativu sira, no mos lideransa komunitariu.
Reportazen RCCT
