Covalima (RCCT) 14-10-25- Ministru Administrasaun Estatal (MAE) Konvoka reuniaun ho Autoridade Munisipiu Covalima relasiona ho preparasaun haka’at ba desentralizasaun poder lokal. Iha sorumutuk ko’alia liu konaba xave prioridade sira ne’ebé iha relasaun ho governasaun lokal no desentralizasaun.
RCCT sita husi publikasaun iha pazina ofisial sosial media (facebook) Ministério Administração Estatal nian iha loron 09 fulan outubru foin lalais. Katak, durante reuniaun, Ministru Administrasaun Estatal (MAE) Tomás do Rosário Cabral, ne’ebé akompaña husi Sekretariu Estadu Dezenvolvimentu Lokal (SEDL) Mateus do Santos Tallo halo diskusaun hodi motiva Autoridade Munisipiu Covalima sira atu halo preparasaun hodi simu desentralizasaun poder lokal.
“Autoridade ne’e reprezentasaun governu sentral nian. Imi mai atu halo trazisaun, Ekipa avaliasaun sei tun, tanba ita atu prepara kondisaun ba avaliasaun, avaliasaun tinan kotuk, muda tia tanba primeiru ministru halo avaliasaun ba pontu lima deit mak finansas, apovizionamentu, ezekusaun, planeamentu ho rekursu umanu. Ita nia intensaun mak imi pasa iha avaliasaun para ita labele depende (tergantung) governu sentral ona, ita sira ne’e mak pilar atu servisu makas ba rai ida ne’e.” Ministru Administrasaun Estatal (MAE) Tomás do Rosário Cabral, dehan.
Governante ne’e mos husu ba Covalima oan sira atu servisu ho disiplina hodi fo atendementu di’ak ba povu, no haka’as an iha servisu sira iha area finansas, Administrasaun, agrikultura, hodi bele prense kondisaun minimu, nune’e Covalima oan sira bele sai prontu simu poder lokal.
Reportazen RCCT
