Maubisse (RCCT) 15-08-25- Molok loke atividade Expozisaun komemora loron juventude mundiál, partisipante sira husi Alumni Parlamentu Foinsa’e Timor-Leste (APFTL), Oxfam Timor-Leste no Asosiasaun Jornalista Timor Lorosa’e (AJTL) simu uluk matak malirin tuir lisan no kultura Rabilau, Munisípiu Ainaro, Postu Administrativu Maubisse, suku Maubisse Vila.
Nune’e Xefe suku Maubisse Vila, Wilson Nivio Maria Pereira Mendonça, agradese ba parte hotu ne’ebé eskolla Rabilau sai fatin turizmu Komunitariu ne’ebé juventude produtivu hodi halo atividade espozisaun.
“Agradese ba parte hotu ne’ebé hili ona Rabilau sai fatin ne’ebé aban sei hala’o imi nia atividade interkámbiu, ita bo’ot sira hili ona fatin ida ne’e hanesan Rabilau oan agradese tebes, ho imi nia prezensa sai parte ida ne’ebé bele apoia ami hodi hadia diak liu tan sitiu turiztiku Rabilau ba iha future”. dehan autoridade lokal, Wilson Nivio iha Rabilau, segunda (11/08).
Membru Asosiasaun Parlamentu Foin sa’e Timor-Leste (APFTL), Deviana Sarmento, hatete, atividade espozisaun ne’ebé hili fatin ne’e tanba fatin potensial atu promove turizmu ba mundu.
“Hili fatin ida ne’e atu organiza tanba, ita hateke fatin ne’e hanesan fatin potensial atu kontinua promove la’os de’it iha munisípiu maibé ita hakarak promove ba mundu katak ita moos iha fatin ne’ebé furak”. Deviana afirma.
Ho opurtunidade ida ne’e atu komunidade kontinua promove agrikultura, joven produtivu, joven iha kreatividade.
Enkuantu loron 12 Agostu nudar loron internasionál Joventude sira, hodi fo opurtunidade ba joven sira atu kria espasu hodi organiza halo dialogo ba joven kreativu no foinsa’e agrikultura.
Jornalista : Julio Salinas
Editor : Chamot Nahac
