Covalima (RCCT) 04-08-25-Lia Na’in Sira husi Aldeia FAtuisin, Suku Kamenasa, Postu Administrativu Suai, Munisipiu Covalima husu ba Governu no Emprezaria operador mina, WOODSIDE atu esforsu dada kadoras mai timor leste.
Lia Na’in Aldeia Fatuisin, Anacleto Amaral, hato’o lia ne’e, iha ambitu vizita delegasaun husi Kompañia Internasional Woodside, Julie Fallon no Ministru Petrolio no Rekursu Naturais, Francisco da Costa Monteiro iha Suku Kamenasa, Aldeia Fatuisin foin lalais ne’e.
“Ohin loron ami hotu-hotu hein buat ne’ebé ami hotu hakarak tebes, husu ba ita bo’ot atu haruka kadoras mai Timor. ami hein ba ami nia riku soin ida ne’ebé maka ohin loron ami nia na’in ulun sira fera ulun para atu buka ba ami Timor nia moris maka atu dada kadoras mai Timor” Lia Na’in Anacleto Amaral, dehan hafoin halo sorumutu ho ekipa Woodside no MPRM iha Uma Lisan Haemolin foin lalais ne’e.
Hatan ba lia na’in sira nia preokupasaun ne’e, reprezenta Woodside Julie Fallon hatete sei servisu hamotuk ho governu atu lori Kadoras mai timor leste no harii Suai Supply Base iha Covalima.
“Ha’u apresia no komprende nai lia na’in sira nia lia fuan konaba Kadoras, konaba Supply Base ne’e la’os buat foun ne’ebé hau foin rona, maibe ha’u rona mos bebeik ona husi Timor Gap no Ministru rasik, ne’ebé ha’u komprende tebes importansia husi asuntu sira ne’ebé maka ohin ita bo’ot sira foti ne’e, ida ne’e foin primeiru ves karik iha istoria Woodside lori ekipa ne’ebé maka bo’ot tebes mai iha kosta sul, liliu mai iha fatin ida ne’e, lori mos membru senior sira ne’ebé maka iha pozisaun bo’ot inklui ekipa teknikal sira ho ida ne’e hatudu katak ami hakarak atu servisu hamutuk para bele dudu projetu ba oin, agora ba oin ami sei kontinua servisu halo koperasaun di’ak liu tan governu liu husi ministeriu no mos Timor Gap no mos agradese ba oportunidade hodi ami bele marka prezensa iha ne’e no mos bele mai hodi haree ita bo’ot sira nia rai no ita bo’ot sira nia fatin ida ne’e” dehan Julie Fallon.
Iha Vizita ne’e Ministru Petrolio no Rekursu Minerais, Francisco da Costa Monteiro, ne’ebé akompaña husi Prezidente TIMOR GAP.EP, Rui Soares no Autoridade Covalima hamotuk ekipa delegasaun husi Woodside hala’o enkontru iha Airportu Suai, hafoin remata enkontru halo vizita ba iha areador Aeropotu Suai. Kontinua observa konstrusaun uma ba komunidade afetadu ba aeroportu suai. Hafoin ekipa konjunta ne’e hala’o sorumut ho lia na’in sira iha Aldeia Fatuisin, remata husi ne’e ekipa kontinua hala’o visita area Suai Supply Base no visita ikus liu iha Ospital Referal Suai.
Jornalista : Julio Salinas
Editor : Chamot Nahac
