Covalima (RCCT)08-25-Lia na’in husi Postu Administrativu 7 mak hanesan, Postu Administrativu Suai, Zumalai, Maukatar, Fatululik, Tilomar, Fohorem no Fatumea, Munisipiu Covalima hamutuk ho Timoroan sira husi Nusa Tenggara Timur (NTT) hatur fatuk “Fraternidade” iha Monumentu Setembru Negro Suai, nu’udar simbolu atu hametin fraternidade no rekonsiliasaun entre Timoroan sira.
Hafoin hatur fatuk “Fraternidade” iha Monumentu Setembru Negro, kari aifunan no sunu lilin, Pe. Jovito Rêgo de Jesus Araújo, ne’ebé diriji orasaun, husu maromak halo nakfilak fatuk ne’e sai fatuk inan no sai uma rekonsiliasaun, uma ida ne’ebé sai horik fatin ba maun ho alin, feto ho naan, hodi hetan k’roman husi espiritu lia loos ninian,
“Atu ami bele hamriik hanesan fatuk ne’ebé metin hodi defende lia loos, justisa ho perdaun hodi bele lolo liman ba malu atu tane lisuk ami nia rai. Ami nia maromak ita bo’ot mak fatuk inan ida ne’ebé ami hotu-hotu bele buka fatin atu helik wainhira ami sente k’bit laek, ami folin laek, wainhira ita bo’ot harii kreda iha rai ida ne’e”, Pe. Jovito temi lia ne’e liu husi orasaun.
Serimonia ne’e partisipa husi Sekretariu Estadu Arte no Kultura (SEAK), Jorge Soares Cristovão, Diretór Ezekutivu Chega!, Hugo Maria Fernandes, Prezidente Konsellu Administrasaun Chega, Manuel Pereira, no Membru Konsellu Administrasaun sira, Prezidente Autoridade Munisipiu Covalima, Miguel Armada Cardoso (Razão), Prezidente Autoridade Munisipiu Baucau, Veneranda Lemos no entidade sira seluk inklui delegasaun sira partisipa Festival Fronteira ne’ebé mai husi NTT Indonesia no teritoria Timor Leste.
Reportazen RCCT
