Komunidade Aldeia Salele Bo’ot, Luis Amaral Lopez, esplika, iha tinan 2000 to’o 2013 komunidade Salele bo’ot sei halo produsaun hare iha natar hetar 6oresin ne’e, maibe komesa husi tinan 2014 to’o agora rai pontensia ba produsaun ai han lokal ne’e tenki abandona tan infrenta problema laiha trator atu fasilita komunidade sira.

“Iha tinan 2000 to’o 2013 komunidade sei halo natar, maibe husi 2014 to’o ohin loron la halo ona natar, komunidade rai maran maibe ba agora daudaun la halo ona hodi abandona hela rai sira ne’ebé iha potensialidade ba agrikultor nian, balu halo balu la halo, kuandu trator iha komunidade hotu hakarak atu halo natar tanba bee barak, maibe atu halo natar uza manual labele” informa Komunidade Aldeia Salele Boot, Luis Amaral Lopez, ba RCCT iha Aldeia Salele Boot Kuarta (03/04).

Nune’e mos, Xefe Aldeia Salele Boot, Teofilo de Araujo, hatete komunidade Aldeia Salele Boot maioria moris ho vida agrikultor liu husi halo produsaun hare iha natar, tan ne’e nia husu ba governu liu liu ba Ministeriu Agrikultura atu ajuda trator ba komunidade sira iha Salele Bo’ot.

“Iha aldeia ida ne’e, maioria ema agrikultor, rai iha ne’e pontensia liu ba moris agrikultor, iha ne’e ami abandona rai barak tanba trator laiha, rai ne’ebé ami abandona hamutuk iha hektares 69, husi rai hektares ne’e 60 resin ne’e ami olah iha hektares 20 resin deit, barak maka abandona tanba laiha trator atu halai natar, tan ne’e husu ba ministeriu agrikultura atu bele tau matan hodi apoiu netik trator mai iha Salele Bo’ot atu nune’e ba futuru bele hodi halo hotu natar ba rai sira ne’ebé oras ne’e abandona, durante ne’e ami nunka halo proposta ba iha governu ka organizasaun ruma atu hodi husu tulun konaba trator, tan ne’e liu husi media ami hakarak husu governu atu bele tau matan ba povu Salele Bo’ot nia preokupasaun ne’e” mia informa.

Xefe Aldeia Salele Bo’ot Teofilo de Araujo mos relata koana be sufisiente ba komunidade sira atu halai natar maibe susar bo’ot liu mak laiha trator atu fila rai. Entretantu, husi rai natar hektares 69 ne’e, iha hetar 20 resin mak dadaun ne’e komunidade salele bo’ot transforma ona hodi halo to’os.

Jornalista : Julio Salinas/Moi Chung

Editor       : Chamot Nahac