Covalima (RCCT)10-03-25-Domingu horsehik Loron 09 fulan marsu, mosu insidente, Korenti Mota Tafara hakoi kompañia Holpilat Unipesoal.Lda ninia Kareta Baskolante ida ho sapa matrikula B. 93.026, iha area Lakalese, Aldeia Natardik, Suku Dato Tolu, Postu Administrativu Fohorem.
Kondutór Jose Pereira Bere fo sasin katak mosu insidente ne’e wainhira konduz Baskolante ne’e husi diresaun Aldeia Fatu Loro, Suku Taroman mai halo servisu area Foho K’nusuk parte Lo’okeu Foho nian, maibe lakonsege hakur liu mota, tanba roda kareta mout iha rai henek, iha ne’eba sira esforsu atu dada sai kareta ne’e, maibe la konsege to’o mota tun sasurut rai henek hodi hakoi metin tiha kareta ne’e.
“Kareta ne’e diresaun husi Postu Fatululik mak mai atu hala’o servisu iha mota sorin ne’e, to’o iha mota k’laran kareta mout, entaun ami dada lori kareta seluk ba kotuk no mai oin mos la di’ak, derepenti mota tun, entaun ami mos lori kareta dada la bele, pasensi ami lori tali kesi ho ai deit no mos ami hare deit husi dok tanba korenti mota bo’ot” Kondutór Jose Pereira Bere esplika ba jornalista sira (10/03).
Kondutór Jose Pereira Bere, fundamenta, maske sira esforsu dada sai Baskolante ne’e husi mota laran maibe korenti forsa liu, maka sira tenki salva Baskolante ne’e, kesi ho tali iha ai hun bo’ot besik iha mota ninin, nune’e korenti mota labele sasurut kareta baskolante ne’e tun ba tasi.
Entretantu, dadaun ne’e kareta baskolante ho sapa matrikula B.93.026 ne’e hasa’e ona husi mota laran, ho kondisaun at grave.
Jornalista : Alfredo Barreto
Editor : Chamot Nahac
