Covalima (RCCT) 23-03-23, Diretor Projetu Tasi Mane, Francisco Ferreira, hatete loloos ne’e iha tinan 2015 liu ba ne’e hahu hala’o ona konstrusaun ba mega projetu Suai Supply Base (SSB) tanba mosu dezentendimentu entre governu Timor-Leste ho konsultan tan ne’e tribunal das kontas la fo vistu atu bele hahu halo konstrusaun ba SSB.
“Sim hau hanoin liga fali istoria ba kotuk hanesan hau dehan loloos ne’e iha tinan 2015 liu ba ne’e hahu ona konstrusaun maibe infelismente ita labele halo tanba iha kestaun legalidade balu ne’ebe maka parese seidauk prense didiak tan ne’e maka tribunal das kontas la fo vistu ba konstrusaun ne’e rasik tantu dezentendimentu entre konsultan ho governu Timor-Leste ba asuntu ida konsultan nia problema lao hela” informa Diretor Projetu Tasi Mane, Grancisco Ferreira, ba jornalista sira hafoin remata desimina informasaun ba katuas lia na’in sira iha Covalima ne’ebe hala’o iha Salaun Administrasaun Postu Administrativu Suai, Kuarta (22/03).
Nia haktuir problema ne’e laos foin la’o agora maibe la’o desde momentu mandatu governasaun anterior ministeriu refere lidera husi Ministru Petroleo sesante Alfredo Pires, asuntu ne’e mos lori ba tribunal, mais depois buka meus atu resolve maibe seidauk konsege hetan nia solusaun ida tantu prosesu ne’e lao hela parte legal sira mak haree hela asuntu ne’e maibe parte tekniku sira kontinua hala’o serbisu para depois belebhetan noa solusaun.
Nia afirma parte tekniku ninian kontinua halo serbisu hodi hein rezultadu husi tribunal foti desizaun ba prosesu ne’ebe la’o hela, parte tekniku labele hein deit maibe tenke hola inisiativa para halo estudu seluk ne’ebe relevante ho projetu Suai Supply Base depois bele ezekuta projetu ne’e ba oin tanba hein problema ne’e bele lori tempu ba SSB ne’e.
“Tanba se ita hein problema ne’e hotu maka ita foin bele halo ne’e ita bele lori tempu ba projetu SSB ne’e, ita tenke buka meus hotu para oinsa bele dudu nafatin prosesu ida SSB ne’e lao ba oin nafatin, prosesu legal kona-ba asuntu ida ne’e husik ba sira legal sira maka fo informasaun detallu, maibe parte tekniku ami buka hela mekanismu para oinsa halo estudu viabilidade, estudu tekniku, estudu komersiais sira ne’e depois aban bainrua ita tama ba iha detail engineering dezain ida hodi bele implementa projetu ne’e ba futuru” nia esplika.
Nia dehan problema ida ne’e kompetensia governu nian liliu ba iha Ministériu Petroleo no Minerais tuur buka solusaun ba asuntu refere ho konsultor sira ne’ebe maka tenta lori hela kazu ne’e ba iha tribunal, maibe atu hatene klean liu kona-ba ida ne’e hanoin parte legal sira maka iha kompetensia bele fo informasaun klaru liu.(JS)
