Covalima (RCCT) 30-05-23-Xefe Suku Tashilin Martinho Magno, hatete konfrontasaun iha suku laran entre joven husi Aldeia Bora Ikun mai asaltu joven sira iha Bairro Tashilin, Aldeia Galitas, suku Tashilin, Postu Administrativu Zumalai iha Segunda (29/05) maizumenus iha tuku 10 kalan, iha konfrontasaun ne’e lao durante oras nia laran polisia nunka tun hodi halo atuasaun maske hetan ona kontaktu husi xefe suku rasik ba iha polisia.
“Sim akontese primeiru kedas antes labarik sira tuda malu hau halo ligasaun ba seguransa maibe kuaze oras rua nia laran ema tuda malu to’o estraga sasan ne’e seguransa hau nunka haree to’o hotu tiha ema fila ona maka foin polisia sira to’o mai halo atuasaun maibe suspeitu estraga sasan ne’e sira fila hotu ona, polisia mai ema laiha, ne’ebe sira ida estraga ema ninia sasan rahun ne’e inklui hau rasik hanesan xefe suku nia uma janela vidru sira rahun no motorizada estadu nian rahun hotu mos polisia mai ema sira laiha ona” informa xefe Suku Tashilin Martinho Magno nudar mos vitima konta konta kronolojia ba jornalista RCCT iha Suku Tashilin Tersa (30/05).
Nia dehan iha kalan ne’e kedas komandante munisipiu ho nia membru sira mai to’o iha fatin akontesimentu, maibe sira to’o mai mos suspeitu sira halai lakon hotu ona.
Xefe hanesan mos vitima hakarak sujere parte seguransa atu bele buka tuir lalais ba ema sira ne’e hodi prosesu tuir lei ne’ebe maka vigora iha Timor-Leste.
“Hau.mos la komprende tanba buat hotu lao ho lei atu halo atuasaun mos eskuadra Zumalai tenke rona orientasaun husi komandante munisipiu, ne’ebe sira iha eskuadra Zumalai hein deit orientasaun to’o sasan no uma sira ema baku rahun hotu mos nunka polisia ida tun, maibe molok polisia sira to’o mai mos uma ho sasan sira rahun hotu ona no ema sira halai hotu ba subar maibe akontesimentu durante oras rua nia laran, ida ne’emaka situasaun komunidade Tashilin hasoru, tan ne’e buat hotu ami entrega ba parte lei maka bele hatene deit atu oinsa prosesu ne’e to’o iha ne’ebe depende ba lei nia lalaok tanba buat hotu hato’o ona ba polisia” nia informa.
Xefe suku husu ba parte seguransa buka tuir lalais hodi kaptura ba ema sira ne’ebe estraga komunidade nia uma no sasan sira ne’e hodi responsabilidade ba sira nia aktu krime ne’e.
Hakarak ka lakohi sira tenke tau respinsabilidade ba sasan ne’ebe sira estraga tanba ema povu beik lahatene buat, se karik joven ho joven maka atu han malu ba iha fatin seluk labele mai estraga fali povu sira nia sasan tanba ema povu beik tanba loron ema ba serbisu iha to’os laran kalan hakarak deskansa, ne’ebe ho situasaun sira hanesan ne’e imi hakarak estraga ema nia sasan tenke responsabiliza no buat hotu nudar xefe suku hakarak entrega ba parte seguransa hodi hala’o tuir lei bele haree oinsa ba ema ne’ebe sai suspeitu ba aktu krime uda ne’e polisia bele kaer lalais hodi prosesu tuir lei.
Nia afirma ho akontesementu hori kalan tuku 10 oras Timor-Leste mai to’o ohin dader tama ba oras meiudia ona mos polisia sei dauk kaptura suspeitu ida.
Entertantu tuir observasaun jornalista iha terenu hahu husi tersa dadersan to’o oras 3 loro kraik komando polisia Munisipiu Covalima ne’ebe apoiu husi BOP no polisia espesial tun ba iha terenu hodi buka tuir suspeitu sira tama sai uma iha aldeia Bora Ikun maibe la konsege kaputura joven sira ne’ebe komete aktu krime ne’e, enkuantu to’o notisia ne’e publika sei dauk hetan konfirmasaun husi komandante polisia Munisipiu Covalima.(JS)
