Covalima (RCCT) 05-04-21 Forsa F-FDTL ho UPF kompanha Bravo Kasabauk hamutuk ho Komunidade no Joventude sira iha Posto Administrativo Tilomar realiza actividades hamos (Lere ) dalan hahu husi Aldeia Wetaba to’o Fronteira Posto Wese’i.
Ba Jornalista sira Segundo Komandante PNTL Municipio Covalima Albino Mouzinho esplika, objetivo hamos dalan hahu husi Aldeia Wetaba to’o Fronteira Posto Wesei nune’e, Seguransa F-FDTL no UPF sira nebe koloka iha Posto vizilansia Wese’i bele asessu dalan refere hodi kontribui situasaun seguransa iha Linha Fronteira liu-liu iha Municipio Covalima.
“Objetivo hamos dalan ida ne’e, tamba fatin ne’e protezida, no membru Polisia UPF no F-FDTL iha Posto Tilomar, nebe koloka ba Posto Wese’i, precisa duni dalan atu bele asesu hodi kontrola situasaun iha Linha Fronteira ” Segundo Komandante ne’e dehan iha Fronteira Posto Wese’i.
Segundo Komandante PNTL Munisipio Covalima salienta, Nasaun RDTL sosa ho Ruin no Ran tamba ne’e presija komunidade sira nia kontribui hodi assegura riku soin nebe maka Lokaliza iha Fronteira Covalima.
“ Nasaun ida ne’e ita Sosa ho Ruin no Ran, tamba ne’e presija komunidade sira nia kontribuisaun atu assegura ita nia riku soin nebe maka iha Linha Fronteira atu nune’e ema seluk labele foti, aliened ne’e mos persija komunidade nia kontribuisaun hodi asegura fronteira liliu iha Covalima ” nia haktenik.
Iha fatin ne’e Administrador Posto Administrativo Tilomar Jose de Fatima Ferreira sente orgulho tanba komunidade sira iha Posto Tilomar iha interese ba nasaun ida ne’e, hodi organiza malu ho voluntariomente hamos dalan ba seguransa sira bele asessu hodi kontrola movimento iha Linha Fronteira no tau matan ba rekursu naturais nebe iha area fronteira liliu iha area juridiku postu administrativu Tilomar.
“ Ha’u orgulho tebe-tebes tanba ita nia komunidade sira iha posto ne’e iha duni interese ba rai ida ne’e, tanba maske ho voluntario maibe ami organiza malu hodi hamos dalan ida ne’e ba ita nia F-FDTL ho Polisia UPF sira, nune’e sira bele uja hodi kontrola movimento iha Fronteira ida ne’e, no bele mos tau matan ba ita nia rekursu naturais ne’ebe sufisiente iha fatin ne’e ” Dehan Administrador Postu Administrativu Tilomar iha Wese’i.
Entertanto aktividades hamos dalan ne’e mais ou menus ho distansia Kilo Metro 15, nebe hahu husi Aldeia Wetaba to’o Fronteira Posto Vizilansia Wese’i, no Partisipa husi Segundo Komandante PNTL Municipio Covalima, ho Membru UPF no F-FDTL, Administrador Postu Administrativu Tilomar, Xefe Suku tolu (Lalawa, Beiseuk, Kasabauk ) no partisipa maximo husi komunidade no Jovemtude iha Postu Administrativu Tilomar.
Jornalista : Tynho Gusmão
Editor : Chamot Nahac
