Covalima (RCCT) 08-07-25-Komunidade sira iha Aldeia Gala Suku Agradese ba governu ne’ebé lori ona dezenvolvimentu hanesan projetu eletrifikasaun, konstrusaun estrada no seluk tan ba to’o sira nia hela fatin.
Molok ne’e, komesa kedas husi okupasaun Indonezia durante tinan 24 nia laran, to’o timor hetan ukun rasin an tama ona ba tinan 20 resin, komunidade iha Aldeia Gala, Suku Beko la asesu ba liña eletrisidade no asesu ba estrada, maibe iha mandatu governu da sia foin dada liña eletrisidade no hadi’a estrada to’o iha Aldeia Gala Suku Beko. Hanesana komunidade Mariano Gonçalves, konfesa ba jornalista sira iha loron 04 fulan Jullu foin lalais, iha Aldeia Gala.
“Uluk ha’u nudar Xefe Aldeia durante tinan 10, iha tinan 2017 ahi atu tama maibe la konsege tama, maibe agora daudaun buat sira ne’e pakote hotu estrada mos tama, ahi mos tama ami kontente, no agradese bo’ot ba governu ida ne’e. Agora daudaun iha tinan 2025 ne’e maka foin sente ukun-an tanba lakleur tan ahi mos atu lakan ona estrada tama daudauk ida ne’e maka ami sente kontente. Ha’u ukun tinan 10 hahu iha tempu Indonezia mai 2007 foti fali ha’u nudar Xefe Aldeia to’o 2017 maka para husi Xefe Aldeia ne’ebé buat ida la mosu mai maske ha’u husu bebeik ba iha ukun na’in sira nunka mais mosu, maibe agora daudaun ami kontente tanba estrada tama, ahi tama ne’ebé ami agradese bo’ot ba governu ida ne’e bele lori ona dezenvolvimentu to’o ona iha aldeia ida ne’e” Komunidade Aldeia Gala, Mariano Goncalves, fo sasin ba jornalista.
Komunidade Armando Barreto rekuñese Governu da Sia ne’ebé lidara husi Primeiru Ministru Kay Rala Xanana Gusmão lori duni dezelvolvmentu ba to’o baze no lori povu iha area rural senti timor nia ukun rasik an ne’e, basa sira bele ona asesu ba liña eletrisidade no mos asesu ba estrada.
“Ha’u sente kontente tanba nudar komunidade durante tinan barak nia laran hahu husi okupasaun Indonezia mai to’o ukun an tama ona tinan 20 resin estrada ho eletrisidade la tama, maibe ohin loron ami apresia tebes ba governu da sia tanba bele lori ona ahi no estrada mai iha komunidade sira iha Aldeia Gala, Suku Beko, Postu Administrativu Suai” dehan Komunidade Armando Barreto.
Enkuantu tuir observasaun nota katak oras ne’e daudaun reabilitasaun ba estrada rural iha Suku Beko, komesa la’o hahu kedas husi Aldeia Bibel ba to’o iha Tobur no projeitu eletrifikasaun la’o namanas hela, nune’e tempu badak komunidade iha Aldeia Bibel, Gala, Teda no Tobur bele ona asesu ho dignu ba liña eletrisidade no estrada.
Notisia Relevante : https://www.rcct.tl/pam-rekunese-povu-covalima-sente-ona-dezenvolvimentu-iha-tinan-23-nia-laran/
Jornalista : Julio Salinas
Editor : Chamot Nahac
