Covalima (RCCT) 11-02-24-Komunidade aldeia-4 Suku Lour Postu Administrativu Zumalai, maka hanesan Aldeia Salasa, Tilis, Lae Gatal no Uluk Lolo iha Suku Lour hetan ameasa husi mota Chulo iha tempu udan.
Xefe Suku Lour Martinho Julio Barreto Alves, hatete maske governu liu husi ministeriu relevante halo pna survey no enkamiña iha pakote emerjensia maibe to’o agora seidauk realiza normalizasaun mota no halo boronjong.
“Kuandu iha tempu udan ona ha’u nia komunidade husi aldeia-4 hanesan Aldeia Salasa, Tilis, Lae Gatal no Uluk Lolo sempre moris la hakmatek tanba mota ne’e ameasa tebes ba sira nia hela fatin, iha ona governu ka estadu ida ne’e mai halo ona survey ba mota Chulo ne’e no hatama ona ba iha programa emerjensia nian maibe agora la rona fali rezultadu nia kontinuasaun ne’e halo nusa ita la hatene” informa Xefe Suku Lour Martinho Julio Barreto Alves, ba jornalista sira iha Sede Suku Lour.
Martinho Julio Barreto Alves haktuir, daudaun mota Chulo la’os ameasa deit ba iha komunidade nia uma hela fatin maibe fo ameasa mos ba edifisiu publiku ne’ebé governu hari ona iha Aldeia 4 pertense ba Suku Lour.
“iha tinan 2023 mota Chulo tun hodi sobu komunidade nia hela fatin no tama iha komunidade nia uma no lori komunidade nia animal karau, fahi, bibi inklui sasan uma laran dapur nian mota lori hotu, mota refere pernah sobu ona uma iha aldeia Uluk Lolo ho Aldeia Salasa, tan ne’e agora daudaun ameasa tebes iha Salasa ameasa tebes ba komunidade nia uma hela fatin inklui kapela no eskola hanesan mos iha Aldeia Lae Gatal mos oras ne’e hetan ameasa hotu husi mota refere” nia dehan.
Entertantu Xefe Suku Lour Martinho Julio Barreto Alves dehan, agora to’o tempu udan, nune’e kalo governu la tau atensaun agora maka komunidade iha aldeia 4 mak hanesan Aldeia Salasa, Tilis, Lae Gatal no Uluk Lolo iha Suku Lour sei sai vitima ba inundasaun no mos fasilidade publiku sira iha aldeia-4 refere mos sei hetan estragu husi mota.
Jornalista : Julio Salinas
Editor : Chamot Nahac
