Covalima (RCCT) 06-06-25-Sesta Semana ne’e Kompañia Queenzha Falov Unipesoal.Lda entrega ona uma merkadu Beko ne’ebé ho medida naruk metru 50 no luan metru 14, hafoin finaliza konstrusaun durante fulan 3 nia laran, liu husi projetu PDIM.
Prezidente Autoridade Munisipiu Covalima, Miguel Armada Cardoso “Razao” dehan liu husi reuniaun Konsellu Kordenasaun Munisipal desidi hala’o konstrusaun edifisiu iha Merkadu Beko hanesan preparasaun ba Merkadu Rejional iha Suai.
“Uma Ida ne’e loloos atu harii iha merkadu Suai, Tua Derek ne’e, komunidade merkadu Suai atu sai be merkadu rejional, ho hirak ne’e maka liu husi reuniaun konsellu Kordenasaun Munisipal hodi deside obra ida ne’e mai fali iha Beko, tanba area juridiku Suai nian hotu, ne’ebé ita muda mai iha ne’e ho nia durasaun konstrusaun fulan 3, agradese maske prosesu kleur obra ne’e la sala halo iha outobru 2024, maske la’o neneik konsege finaliza, tan ne’e agradese mos ba kompañia tanba ajuda mos buat balu ne’ebé latama iha BOQ no dezeñu maibe nia bele halo hotu” Informa PAM Covalima.
Diretóra Kompañia Queenzha Falov Unipesoal. Lda, Emeliana Fame Texeira Lopes, dehan kompañia finaliza ona konstrusaun no retensaunba Edifisiu iha merkadu Beko ho nia medida 50×14 metru, hamotuk kuartu 20, kada kuartu ho medida 5×5 metrus, hafoin intrega ba autoridade covalima para komunidade sira bele hahu utiliza hodi halo atividade negosiu.
“Ohin lokraik di’ak ida ne’e entrega fali ona ba Planeamentu Integradu no Dezenvolvimentu Munisipiu Covalima nian, no kompañia hala’o servisu durante fulan 3 nia laran no agora mos liu ona retensaun, maka ohin entrega ona ne’e. Espera ba oin komunidadesSira iha Beko bele utiliza didi’ak, kuidadu didi’ak merkadu ne’e.” relata Diretora Kompania Queenzha Falov Unipesoal, Lda.
Konstrusaun ba Uma iha Merkadu Beko ho medida luan metru 50 no naruk metru 14, ho numeru 03/A.MCovalima/PAM/SMA/V/2024. Gasta orsamentu ho montante dolar amerikanu rihun atu ida, rua nulu, atus ida sanulu resin ualu, sentavus hitu nulu, ne’ebé hala’o husi Kompañia Queenzha Falov Unipesoal Lda no durasaun servisu durante fulan 3, hahu husi loron 29-07-2024 to’o loron 30-11-2024. No iha loron 06 fulan juñu 2025 kompañia entrega ona ba governu nune’e ba futuru komunidade bele utiliza ona fatin refere hodi hodi halo atividade negosiu.
Jornalista : Julio Salinas
Editor : Chamot Nahac
