COVALIMA—-Joven sira ho inisiativa rasik harii gazebo iha area tasi ibun Suku Suai–Loro, hodi promove turizmu kominitária, iha postu administrativu Suai, Munisípiu Covalima nune’e bele atrai turista sira.
Xefe Suku Suai-Loro Martinho Mendonça, hateten joven sira ho inisiativa harii gazebo iha tasi ibun Suai-Loro, ne’ebé hetan apoiu fundu orsamentu faze dahuluk $ 18,000.00 , husi Ministériu Turizmu Komésiu no Indústria.
“ Ha’u hakarak informa joven sira iha inisiativa forma grupu hodi harii gazebo iha Suai-Loro ne’ebé hetan apoiu orsamentu husi Ministériu Turizmu Komésiu no Indústria” informa Xefe Suku Suai-Loro Martinho Mendonça ba jornalista sira iha Suai-Loro, Tersa (17/01).
Joven inisiativa hosi harii gazebo ho obejetivu atu atrai turista iha rai laran no rai liur atu bele vizita hodi bele hetan rendimentu ne’ebé hahú harii molok atu tama loron bo’ot natal tinan foun.
Orsamentu faze dahuluk $ 18,000.00 grupu harii ona gazebo atinze ona pursentu 46 ho razaun tanba harii gazebo finaliza ona hein de’it ona harii fatin atu hasai foto.
Diretór Servisu Munisipal Jestaun Merkadu no Turizmu Vitorino do Carmo hateten, joven sira inisiativa harii gazebo iha tasi ibun Suai-Loro ne’e apoiu fundu husi dirasaun jerál Turizmu kominitária.
“Foin lalais iha fulan novembru 2022 ha’u ho ha’u nia xefe departamentu halo konsulta jeral ho dirasaun jerál turizmu komunitária iha Nasional, sira foin fó kuñesementu ba ami kona–ba joven sira inisiativa harii gazebo iha tasi ibun Suai-Loro” nia dehan.
Munisípiu Covalima iha área turizmu sira hanesan, Turizmu Komunitária, relizioja turizmu istóriku no seluk tan.
Munisípiu Covalima iha postu administrativu 7 hanesan, Fatululik ,Fatumea, Fohorem, Tilomar, Maucatar , Zumalai no Suai ho nia suku 30 , aldeia 148.
Suku Suai-Soro ho total uma kain 1,168 ho nia aldeia sira hanesan Loro uma-kain 411 mane-ikun 247, Lo’o 212 sukabi-laran 158 no Akar-Laran 140.
Ho total populasaun iha suku Suai-Loro hamutuk 4,654 husi númeru ne’e kompostu husi feto na’in-798 no mane na’in-787.(Azu)
