Covalima (RCCT) 23-06-25-Institutu Nasional Seguransa Sosial (INSS) Segunda ne’e halo lansamentu pagamentu ba benefisariu idosos no ema ho difisensia faze daruak tinan 2025 ba teritoriu timor laran tomak.

Lansamentu pagamentu ba benefisiariu idozus no ema ho difisiensia ne’e hala’o iha sede suku kamenasa, Postu Administrativu Suai, Munisipiu Covalima. Prezidente Konsellu Administrasaun Institutu Nasional Seguransa Sosial (INSS) Arlindo Pinto, dehan iha tinan ida ne’e nia pagamentu faze primeiru hala’o iha Ermera no faze daruak nia hala’o iha Covalima ne’e ba nivel teritoriu nasional, no ba total dadus munisipiu Covalima hamotuk benefisariu na’in 7.365.

“Agora halo pagamentu ba ita nia ferik ho katuas sira inklui ema ho difisiensia ba faze daruak nian, konaba lansamentu ita hahu lansamentu primeiru iha Ermera no ohin ita kontinua iha Covalima, ne’e hala’o iha Suku Kamanasa, Postu Administrativu Suai, iha Munisipiu Covalima total benefisariu husi ferik katuas no ema ho difisiensia hamuruk ema na’in-7365, purtantu iha Postu Administrativu Suai kompostu husi suku-5 hamutuk benefisariu ema na’in-2200 no iha Suku Kamanasa rasik benefisariu hamutuk ema na’in-382” Prezidente Konsellu Administrasaun Institutu Nasional Seguransa Sosial (INSS) Arlindo Pinto, ba jornalista sira hafoin remata lansamentu pagamentu faze daruak nian ba banefisariu sira iha Suku Kamanasa, Segunda (23/06)  informa.

Xefe Suku Kamanasa Fernando Noronha, husu ba benefisiariu sira atu jere didiak osan ne’ebé estadu.

“Fo hanoin ba ha’u nia inan ba ha’u nia aman no ha’u nia alin difisiente sira katak buat ne’ebé maka durante estadu hanoin komesa kedas iha tinan 2008 ate agora. Iha biban ne’e mos hakarak hato’o tan katak osan ne’ebé imi hetan labele lori ba halo fali lia no ba joga, maibe osan ida ne’ebé imi hetan atu lori ba halo tratamentu ba imi nia saude no uza ba han no hemu” nia dehan.

Total benefisariu iha Munisipiu Covalima hamutuk ema na’in rihun hitu atus tolu nen nulu resin lima (7365) kompostu idosos ema na’in-7021 no ema ho difissiensia ema na’in-344. Engkuantu total benefisariu husi Postu Administrativu Fatululik hamutuk ema na’in-250, Fatumea ema  na’in-510, Fohorem ema na’in-604, Maukatar ema na’in-1016, Suai ema na’in 2200, Tilomar ema na’in-847 no Postu Administrativu Zumalai hamutuk ema na’in-1838, ho total osan ba benefisariu sira iha Munisipiu Covalima hamutuk $ 1,693,240.00.

Jornalusta : Julio Salinas

Editor        : Chamot Nahac