Covalima (RCCT) 14-06-25-Sabadu fim de semana ne’e Ministeriu Edukasaun liu husi Institutu Nasional Formasaun Dosente no Profesionais Edukasaun (INFORDEPE) ensera atividade formasaun konaba jestaun lideransa, jestaun administrasaun no jestaun finansas, ne’ebé durante semana ida nia laran INFORDEPE fasilita formasaun ba diretór eskola no kordenador eskola sira iha Munisipiu Covalima.
Prezidente INFORDEPE Domingos Martins, hatete formasaun refere hala’o hahu kedas iha fulan Setembru 2024 iha Munisipiu 14 nune’e foin finaliza iha fulan juñu 2025.
“Atu relata katak atividade ida ohin loron ne’e ninia sekuensia halo serimonia enseramentu ba formasaun lideransa eskola sira, no formasaun ida ne’e ita inisiu loron 23 fulan Setembru 2024 no ohin enseramentu ofisial iha Covalima, tanba objetivu prinsipal ita bolu sira mai ne’e ita atu fahe rezultadu ne’ebé maka ita atinje ona durante forsamasaun ida ne’e, tan ne’e , apela ba diretór servisu munisipal sira no superientendente edukasauun sira atu sira bele akompaña nafatin lideransa sira, nafatin halo monitorizasaun” Prezidente INFORDEPE Domingos Martins, Informa ba jornalista sira iha Salaun Administrasaun Munisipiu Covalima, Sabadu (14/06).
“Formasaun ida ne’e ita foka liu ba modul-7, modul ida ne’e bele dehan atu avalia dirijente sira iha eskola liliu sira ezerse sira nia funsaun ho di’ak ka lae?, ho nune’e modul hirak ne’e bele koresponde loloos, tuir fali konaba modul sira hanesan fraternidade umana, kurikulu, administrasaun jestaun, administrasaun finansas no lejislasaun, inklui mos lideransa ne’e rasik, ida ne’e maka ita nia programa prinsipal ba eventu ida ne’e” nia dehan
Kordenadora EBF Wedare Sanfuk, Flaviana Filomena, agadese tanba bele partisipa iha formasaun ne’e hodi hasa’e sira nia abilidade hodi halo jestaun iha eskola ida idak.
“Ami simu konaba jestaun klasse no jestaun finansas ida ne’e di’ak tebes mai ami, iha oportunidade ida ne’e hakarak husu nafatin atu bele iha tinan ida bele hala’o formasaun dala rua ou dala tolu, no materia ne’ebé ami simu iha formasaun durante semana ida nia laran ne’e ami fila ba sei aplika ba estudante sira iha eskola” nia dehan
Nune’e mos Kordenador Eskola Sekundaria Jeral Publiku (ESGP) Suai Klase Paralela Salele, Daniel Cardoso, rekuñese formasaun refere paetenente tebes ba koordenador no direitor eskola sira hodi bele administra eskola ida idak liu liu buka solusaun ba difikuldade ne’ebé sira infrenta.
“Durante ne’e ami hetan oinsa atu lidera, oinsa atu hatene ida-idak nia eskola hodi bele forma konsidaun eskola ne’ebé bele hetan difikuldade ruma, liu husi administrasaun eskolar, liu husi metode strutura eskolar oinsa atu bele hatene nia pontualidade balun, formasaun ida ne’e mos iha material balu ne’ebé foka liu kona ba oinsa hatene konaba bibilioteka klazen ne’ebé maka iha, tanba iha eskola balu laiha biblioteka, laiha laboratoriu, antaun mekanismu ne’ebé liu husi formasaun sira fo ita bele halo biblioteka movel bele mos tau iha sala laran no bele mos ita muda tau husi klase ida ba klase seluk, agradese ba INFORDEPE ne’ebé bele fahe ona esperiensia liu husi formasaun semana ida ne’e, tanba bele motiva ami bele sai lider ida atu bele aplika oinsa maka ema ne’ebé sai lider iha eskola ida-idak hodi bele muda, forma ami nia eskola bele iha dezenvolvimentu iha mudansa ba oin” nia salienta.
Enkuantu formasaun ba Koordenador no Diretór eskola sira ne’e hala’o durante semana ida ne’ebé foka ba jestaun administrasaun lideransa ne’e realiza iha Eskola Teknika Vokasional Akar Laran. Fasilita husi INFORDEPE ne’ebé partisipasaun masimu husi kordenador eskola no diretór eskola sira iha Covalima hamutuk ema na’in-155.
Jornalista : Julio Salinas
Editor : Chamot Nahac
