Covalima (RCCT) 16-09-24 Institutu Nasional Administrasaun Publika (INAP) fo formasaun ba Xefe tolu nulu iha Munisipiu Covalima konaba Empoderamentu, Servisu Grupo no mos komunikasaun.

Diretór INAP  Fransisco Car  de Araujo hatete formasaun ne’e atu hasa’e kuñesimentu Xefe Suku sira nian hodi bele fo atendimentu ba komunidade sira ho kualidade.

“Formasaun ida ne’e objetivu  oinsa atu fo kapasitasaun ba ita nia xefe suku sira ba sira ne’ebé mak foin dadauk eleitu no sira ne’ebé mak re-eleitu  fali atu nune’e sira bele hetan kuñesimentu no abillidade ne’ebé naton wainhira sira fo atendimentu ba sira nia komunidade sira” hatete Diretór INAP Fransisco C. de Araujo.

Iha fatin hanesan xefe suku Maudemu Maria Fatima konsidera formasaun ne’e di’ak tanba bele hasa’e kuñesimentu ba lideransa komunitaria sira hodi halo atendimentu ba komunidade sira ho di’ak liu tan.

“Ha’u hanoin formasaun ne’ebé ami hetan hahu ohin to’o sesta ne’e no informasaun sira ne’e ba futuru ami bele aplika iha ami nia komunidade sira oinsa mak bele hakbit sira nia moris rasik liu husi informasaun ne’ebé mak ami hetan no atu bele espalla iha ami nia komunidade sira ”  hatete  Chefe Suku Maudemo Maria Fatima

Entretanto formasaun ba Xefe Suku 30 ne’e hala’o durante loron lima salaun Administrasaun Munisipiu Covalima.

Jornalista : Alfredo Barreto

Editor     : Chanot Nahac