Covalima (RCCT) 08-04-25-Governu liu husi Ministeriu Komersiu no Industria (MCI) servisu hamutuk ho parseiru dezenvolvimentu UN Woman iha Timor-Leste kapasita vendedor sira iha Covalima ho objetivu ida hakarak hasa’e rendimentu ekonomia povu nian.
Ditretór Jeral Ministeriu Komersiu no Industria (MCI), Nelito Lima de Araujo, hatete. Liu husi formasaun ne’e atu kapasita vendedores sira hodi bele heten jere osan husi rendimentu ne’ebé sira hetan durante hala’o negosiu.
“Ministeriu Komersiu no Industria liu husi Diresaun Nasional Komersiu Internu ho nia programa ida atu fasilita ita nia vendedor sira, liliu fo formasaun ba sira no servisu ida ne’e la’os MCI mesak, maibe ami ho parseiru UN Woman, servisu hamutuk, ami halo formasaun servisu masimal ne’e loron-4 ba ita nia vendedores sira, liliu vendedor sira ne’ebé maka iha merkadu nune’e mos kios oan sira, ami konvida sira mai atu fo formasaun ba sira para atu nune’e bele hatene jestaun atu maneja sira nia osan ne’ebé durante ne’e sira fa’an sira nia sasan karik hetan osan uitoan sira labele gasta hotu maibe gasta balu no rai hela balu ba sira nia negosiu, ida ne’e maka MCI servisu hamutuk ho UN Woman mai fo formasaun loron-4 ba sira iha Covalima” informa Ditretór Jeral Ministeriu Komersiu no Industria (MCI), Nelito Lima de Araujo, ba jornalista sira hafoin fasilita formasaun ba vendedor sira ne’ebe hala’o iha Salaun enkontru Instituto Apoiu Dezenvolvimrntu Empresarial (IADE) Munisipiu Covalima Tersa (08/04).
Sekretariu Munisipal Asuntu Sosiais no Organizasaun Komunitariu Munisipiu Covalima Filomeno Cardoso, tau esperasa ba negosiate sira katak depois formasaun ne’e remata, sira bele hadi’a di’ak liu tan redimentu familia no rendimentu negosiu.
“Ita bo’ot sira matenek na’in ida, ulun badaen na’in ida, bele halo jestaun di’ak, hodi bele hadi’a ita nia ekonomia familia uma laran, liliu ba hadi’a ekonomia Covalima nian” informa Sek ASOK.
Emprezaria, Mafalda Cardoso, konsidera formasaun ne’e nudar oportunidade, atu hasa’e sira kapasidade iha area negosiu.
“Agradese ba MCI tanba ida ne’e hanesan kesempatan di’ak ba ami emprezaria ho mos negosia ki’ik, tanba durante ha’u mos hanesan eis xefe merkadu ha’u hare barak maka ami nia kapasidade la to’o iha ida ne’e, ne’ebé kesempatan ho sira mai ida ne’e, ami hakarak tuir formasaun ida ne’e atu hasa’e tan ami nia kapasidade, tanba durante ne’e vendedor barak sei menus ba iha negosiu nian, tanba ne’e agradese tebes ba MCI fo ona tempu mai ami vendedor sira bele tuir formasaun ida ne’e durante loron-4 nia laran” Mafalda relata.
Molok realiza formasaun ba negosiate sira iha Covalima, maibe antes ne’e, Ministeriu Komersiu no Industria (MCI), hala’o uluk ona iha munisipiu Ermera, Bobonaro, Baukau, no mos Vikeke.
Entretantu formasaun ba megosiante Covalima ho tema “Ho kapasitasaun vendedores kona ba jestaun, estratejia negosiu, mai ita hasa’e koñesimentu hodi bele dezenvolve liu tan ita nia ekonomia rai laran”, ne’e hala’o durante loron-4 nia laran hahu Tersa ohin no sei remata iha Sesta semana ne’e.
Jornalista : Julio Salinas
Editor : Chamot Nahac
