Covalima (RCCT) 21-08-25 Vise-Ministru Infraestrutura hamutuk ho Ekipa Tekniku integradu ne’ebé hamohan an iha Ministeriu Obras Publika sobu Gabion (boronjong) metru atus lima iha Nala OP Postu Administrativu Zumalai Munisipiu Covalima basa konstrui la tuir dezeñu no BoQ.
Vise-Ministru Infraestrutura Júlio do Carmo, relata katak iha monitozasaun ne’e deteta kompañia Trofanditar Unip.Lda ne’eb”e hala’o projetu muru protesaun no gabion iha Suku Fatuleto Postu Administrativu Zumalai la tuir dezeñu no BoQ ne’ebé mak iha.
“Projetu iha Nala Op ne’ebé mak kompañia ida implementa, iha ne’ebé ita sobu tanba implementa la tuir BoQ, iha dezeñu hatete ke’e tun ne’e metro rua hakoi bronjong ne’e rua, maibe ita sukat metro ida ho balun deit, entaun husu sira para atu bele ke’e tan sentimu 50 para atu bele halo genap metro rua. Sira halo la tuir dezeñu ne’ebé ita sobu metro atus lima” Vise-Ministru Infraestrutura, Júlio do Carmo, esplika.
Vice Ministru Obras Publika husu ba kompañia implementador atu kopera ho tekniku sira ne’ebé destakada iha munisipiu covalima hodi la’o sevisu ho di’ak no mos tenki la’o tuir dezeñu no BoQ ne’ebé mak iha ona.
“Husu ba kompañia sira ne’ebé mak kaer projetu Estrada rural nian no ida ne’ebé mak kaer emerjensia iha munisipiu covalima, hotu hotu atu disiplina servisu tuir dezeñu ho BoQ ne’ebé iha. Servisu tenki kolaborasaun ho tekniku sira ne’ebé mak destaka iha munisipiu covalima.” tenik Vise-Ministru Infraestrutura.
Vise-Ministru Infraestrutura Júlio do Carmo, ne’ebé akompaña husi Asesór Senior ba Asuntu Infraestrutura, Rui Hernani Freitas Guterres hamutuk ho Diretór Nasionál Planeamentu, Peskiza no Dezenvolvimentu ho ninia ekipa, hala’o fiskalizasaun no inspesaun ba projetu sira ne’ebé mak dadaun ne’e implementa iha Munisípiu Covalima. Ho objetivu atu buka hatene progresu implementasaun servisu sira iha terenu basa dala barak akontese kompañia implementadora sira la halo servisu ho seriu no la tuir padraun tékniku nian.
Jornalista : Alfredo Barreto
Editor : Chamot Nahac
