Covalima (RCCT) 16-05-23, Partidu Libertasaun Popular (PLP) hakarak atu hetan votus barak liu hodi manan iha eleisaun parlamentar tinan 2023 hodi kaer governu da sia, tan ne’e liu Organizasaun Feto Popular (OFP) ne’ebe hamahon an iha PLP fo pose ba estrutura feto Popular sira iha nivel Aldeia.

Prezidente Organizasaun Feto Popular (OFP) Partidu Libertasaun Popular (PLP) Munisipiu Covalima, Maria Noviana de Jesus, hatete ohin Organizasaun Feto Popular mai iha Aldeia Muuk Belis, Suku Labarai, Postu Administrativu Suai ho objetivu hakarak fo pose ba feto maluk nune’e hodi hametin estrutura iha PLP nia laran hodi bele manan iha eleisaun parlamentar tinan 2023.

“Ohin hau mai iha ne’e atu fo pose ba hau nia feto maluk sira ne’ebe hamahon an iha feto Popular nia laran, atu nune’e hau nia estrutura bele metin to’o baze ba feto Popular nian, estrutura nivel postu, suku to’o nivel aldeia ida ne’e maka hau nia objetivu ba feto Popular nian” deklara Prezidente Organizasaun Feto Popular Partidu Libertasaun Popular (PLP) Munisipiu Covalima, Maria Noviana de Jesus, ba jornalista RCCT hafoin fo pose ba estrutura feto Popular iha Aldeia Muuk Belis, Suku Labarai, Postu Administrativu Suai, Munisípiu Covalima, Teresa (16/05).

Nia dehan, ohin estrutura sira ne’ebe ohin simu ona pose kompostu husi feto hamutuk ema na’in-12, tamba tuir politika PLP kada aldeia tenke involve feto Popular na’in-12 maka ohin realiza iha aldeia Muuk Belis.

Prezidente Organizasaun Feto Popular Munisipiu Covalima, husu ba feto maluk sira atu forma grupu soru tais, grupu hakiak manu no forma grupu seluk tanba PLP prontu atu apoiu ba grupu sira.

“Kuandu feto maluk sira ne’ebe ohin simu ona pose no forma ona grupu, depois grupu ne’e hato’o sira nia proposta ami husi feto Popular sei ajuda hau nia feto maluk sira ne’e bele hetan tulun liliu ba feto maluk sira forma grupu kona-ba soru tais, karik grupu sira atu hakiak manu, hakiak fahi ita husi partidu bele ajuda sira ho orsamentu ne’ebe naton ba sira nia grupu bainhira sira fo votus ona mai PLP” nia esplika.

Tuir Noviana katak programa PLP sei refere no haree liu ba feto maluk sira, programa saida maka PLP hanoin ba inan feton sira ne’ebe durante ne’e iha uma deit, se bainhira imi fo votus ida ba PLP saida maka PLP hanoin ona ba imi nia futuru.

“Agora daudaun PLP nia programa refere no haree liu ba feto maluk sira, ba feto popular, programa saida mak PLP hanoin ba hau nia inan feton sira ne’ebe maka durante ne’e iha uma deit, maibe se bainhira imi fo votus ida ba PLP saida maka sira hanoin ona ba imi, ba ema ne’ebe funsionariu di’ak tanba nia tuir partidu ida ne’ebe deit mos nia iha ona fatin atu bele sai diretor, xefe departamentu no seluk tan, maibe ba hau nia feto maluk sira iha uma deit maka fo ona votus ida ba PLP iha ona hanoin atu bele muda imi nia moris” nia hateten.

Nia afirma PLP iha hanoin ona ba feto maluk sira katak dalan di’ak liu ne’e maka forma grupu kada grupu ema na’in-5 no bele liu to’o ema na’in-6 atu bele reforsa no ajuda familia uma laran, kualker grupu saida deit, bele harii grupu soru tais, grupu kuda modo, grupu kuda ai oan, bele harii grupu hakiak fahi no manu, harii grupu negosiu ka loke kios.

Tanba kada tinan 5 feto maluk sira ba vota maibe ema halo ona saida ba imi, depois de vota ema sira ne’ebe imi vota ba ne’e la fihir tan ona imi, tanba ne’e PLP nia hanoin ho razaun ida katak feto maluk sira ne’ebe iha uma ne’e atu halo saida ba sira, dalan diak liu halo sira forma grupu PLP prontu fo apoiu.

“PLP nia hanoin di’ak, PLP nia hanoin katak feto maluk sira ne’ebe iha uma deit ne’e saida maka ita bele halo ba sira atu nune’e sira bele vota ba ita, saida mak ita hanoin ba sira, atu apoiu kada pesoal labele tanba iha Timor laran tomak populasaun barak, maibe liu husi dalan ida PLP hakarak ajuda maka liu husi feto maluk forma grupu atu hodi haman naha todan ida husi feto maluk sira liliu iha familia uma laran” nia esklarese.

Nia salienta kuandu forma ona grupu hakiak manu barak ona bele balu ba fa’an, hetan osan hodi sosa batar fo han fali manu ne’e no osan balu bele uza ba nesesidade uma laran no sosa pasta, sapatu no kadernu ba oan sira lori na eskola.

Iha grupu ida nia laran atu buras no la buras ne’e depende ba iha grupu tanba na’in maka jere diak no at ne’e iha grupu nia liman, kuandu jere didiak grupu sei la monu hodi hakman ona katuas oan sira ba buka osan no halo to’os.

Nia promete ba feto maluk sira katak maske vota hotu ona mos PLP prontu apoiu nafatin ba grupu sira laos eleisaun hotu PLP la apoiu ona ne’e lae, maibe kontinua apoiu nafatin bainhira forma ona grupu tanba PLP hakarak hadi’a povu nia moris.

Entertantu Prezidente Organizasaun Feto Popular Partidu Libertasaun Popular Munisipiu Covalima ho nia ekipa remata fo tomada de pose ba estrutura feto popular iha Aldeia Muuk Belis hala’o mos edukasaun votantes katak iha eleisaun parlamentar ne’ebe sei monu iha loron 21 fulan Maiu labele vota ba partidu seluk maibé vota ba PLP numeru-3, alenda ne’e mos Prezidente Organizasaun Feto Popular ho nia ekipa kontinua hakat ba ihan Aldeia Sanfuk, Suku Kamanasa, Postu Suai hodi hala’o ho atividade partidu nian ne’ebe hanesan.(JS)