Covalima (RCCT) 13-06-25-Diretór Servisu Munisipal Saude Covalima, Domingos Sequeira, konfesa katak durante periode 2024 to’o 2025, seidauk rejista sidadaun Covalima mate tanba moras rabies.
Maske nune’e Domingos Sequeira, rekuñese durante 2024-2025, resita pasiente barak ho kazu asu tata maibe la deteta virus rabies.
“Ha’u hatete beibeik rabies ita seidauk deteta, asu tata ema barak, maibe to’o agora desde tinan 2024-2025 ba iha kuarter primeiru ita seidauk deteta pasiente ida mate ho moras rabies, tanba laboratorium la deteta ema katak mate tanba moras rabies” Diretór Servisu Munisipal Saude Covalima, Domingos Sequeira informa ba jornalista sira iha nia k’nar fatin Sesta (13/06).
Diretór ne’e afirma, durante rejista kazu asu tata ema hamutuk na’in-118, maibe husi kazu hirak ne’e la deteta moras rabies.
“Asu tata iha ona ema na’in-118, maibe sira ne’e la deteta dehan sira ne’e kona moras rabies” nia dehan.
Enkuantu durante ne’e tuir informasaun ne’ebé espalla husi ibun ba ibun ema konta katak iha ona sidadaun balu mate tanba kauza husi asu tata iha Covalima, maibe realidade hatudu katak servisu saude munisipiu Covalima liu husi sentru no postu saude sira seidauk rejista kazu husi virus rabies.
Jornalista : Julio Salinas
Editor : Chamot Nahac
