Covalima (RCCT) 26-06-25-Asosiasaun Hali Ba Dame (HABADA) realiza formasaun siguransa komunitaria ba Juven sira iha Suku Beko Postu Administrativu Suai no Suku Maudemu Postu Administrativu Tilomar, nune’e sira bele hatene ona redus krimi, involve komunidade hodi indentifika no preve antes molok mosu problema, no mos promove dialogu iha suku no aldeia.
Diretór Exekutivu HABADA, Abele Amaral, manifesta katak, Formasaun Siguransa Komunitaria nudar atividade esensial ba komunidade sira atu hatene sira nia papel hodi responsaveliza siguransa iha sosiedade tan ne’e persija halo melloramentu komunikasaun entre komunidade sira.
“Involvimentu komunidade ligadu ho seguransa komunitaria. Aktividade ne’e esensial para sira bele komprende sira bele hatene sira nia papel nudar sidadaun ida moris iha aldeia no suku ida, atu nune’e ita bele ko’alia assuntu siguransa. Siguransa ne’e ema hotu tenke fo kontribui liu-liu iha pessoal sira husi aldeia mai tama tan to’o iha suku, Postu no Munisipiu, tanba siguransa ne’e responsabilidade husi ita hotu ninian.” Diretór Exekutivu HABADA, Abele Amaral.
Reprezenta Polisia Nasional Timor Leste Komandu Munisipiu Covalima, Atual Komandante Operasaun, Superintendente Asistente Polisia Joaquim da Costa, konsidera atividade formasaun ne’ebé HABADA realiza ba juven sira, hanesan asaun ida ne’ebé bele hariku informasaun hodi kontribui ba estabiliade siguransa.
“Ida ne’e meius ida ne’ebé di’ak atu bele hariku ita ho informasaun ne’ebé ligadu ho estabilidade siguransa, liu liu informsaun sira ne’ebe hola parte ba iha PNTL nia misaun, no mos atu hakbit ita bo’ot sira iha suku ida ne’e, hahu husi xefe suku no konsellu suku sira nia funsaun iha imi nia ukun ida ne’e atu forte liu tan hare liu bai ha aspetu sigransa nian” Komandante Operasaun, Superintendente Asistente Polisia Joaquim da Costa, dehan.
Reprezenta Autoridade Munisipiu Covalima, Aguinelio Antonio Sarmento do Rego Barros, tau esperansa ba juventude sira atu kopera ho autoridade lokal sira hodi kontrubui reduz desintendimentu ne’ebé dala barak sempre mosu iha komunidade nia let.
“Esperensia balu ne’ebé ita liu tia ona konaba konfllitu ne’ebé sempre mosu bebeik entre ema ida ho ema ida, ema ida ho grupu no mos grupu ho grupu, ida ne’e sempre mosu iha ita nia aldeia, suku, postu to’o bai ha munisipiu. Entaun wainhira mosu ona ita bele halibur malu, bolu ita nia autoridade lokal sira hodi rejolve nudar familia” Aguinelio Antonio Sarmento do Rego Barros.
HABADA husu ba Komunidade liu liu ba Juventude sira atu tur hamotuk hodi fo solusaun ba dezintedimentu ruma wainhira mosu, labele habo’ot problema entre komunidade no juven maibe halo dialogo hodi rejolve nudar familia ida ne’ebé iha domin ba malu.
Jornalista : Julio Soares
Editor : Chamot Nahac
