COVALIMA—-Ministeriu Agrikultura no Peska (MAP) liu husi Departamentu Corpu Guarda Floresta Extensaun fo kapasita formasaun ba corpu guarda floresta Munisipiu Covalima hamutuk na’in-28 kona-ba tekniku floresta ninian.

Xefe Departamentu Corpu Guarda Floresta Extensaun João Dasimanu dos Reis, hatete ohin mai fo kapasitasaun ba guarda floresta iha Vovalima oinsa bainhira tun ba iha terenu bele halo extensaun ba iha komunidade sobre tekniku ba iha floresta ninian.

“Ami mai para bele fo kapasitasaun ba sira oinsa bainhira tun ba iha baze bele halo extensaun ba iha ita nia komunidade sobre tekniku ba iha floresta ninian, oinsa sira bele hanorin komunidade sira sistema agro floresta nian iha to’os laran” informa Xefe Departamentu Corpu Guarda Floresta Extensaun João Dasimanu dos Reis, ba jornalista sira iha resintu Floresta Munisipiu Covalima Kinta (01/06).

Nia haktuir iha momentu ida ne’e kedas mai halore mos lei rejime jeral floresta nian ba corpu guarda floresta sira Covalima nune’e bainhira sira tun ba iha terenu hodi esplika ba komunidade sira, tanba durante ne’e ema barak dehan floresta lei laiha hela deit.

“Ohin loron ami mai ne’e lori lei rejime floresta nian ba iha sira depois ho tekniku sira seluk atu nune’e sira serbisu bazeia ba lei ne’ebe agora daudaun iha” nia esplika.

Nia afirma lei ne’e rasik ko’alia kona-ba halo protesaun ba iha ambiente, depois halo protesaun ba iha animal fuik sira, halo protesaun ba ema labele tesi ai iha dalan, labele sunu rai arbiru ne’e iha lei nia laran hotu kedas” nia dehan.

Nia dehan sansaun ne’ebe maka fob a komunidade sira banhira kontra lei hodi estraga ai no no animal fuik sira hanesan iha tinan 2021 ne’e uza sistema ida halo pendekatan (presepsi) ba iha sira atu nune’e sira lori sasan illegal mai floresta kaptura depois halo sira presta deklarasaun no esplika ba sira katak ba futuru labele komete tan, maibe floresta uza sistema ida ne’e dala ruma komunidade hanesan toman tiha ho buat ida toleransia husi floresta komesa iha Janeiru 2023 mai ne’e parte floresta komesa ona ho sistema ida kuandu kaer toman lori entrega kedas ba iha Ministeriu Publiku hodi halo prosesu judisial.

Partisipante Membru Corpo Guarda Floresta Munisipiu Covalima Joselino do Carmo sente orgulhu ho formasaun refere tanba liu husi formasaun sira ne’e maka bele hatene klean liu no bele lei rejime jeral kona-ba tekniku nian.

“Ami husi corpu guarda floresta Munisipiu Covalima sente kontente tanba ami hetan informasaun liliu ba iha lei rejime jeral kona-ba tekniku sukat ai, no ai hun hira bele sai kubik ida, ai lolon hira maka bele sai kubik ida, atu implementa iha terenu” nia hakotu.

Entertantu formasaun ne’e hala’o durante loron 3 hahu ohin no sei remata iha sabadu finde semana ne’e, enkuantu formasaun ne’e espesial ba guarda floresta sira iha Munisipiu Covalima tanba ne’e maioria gurda floresta sira partisipa hotu.(Azul)