Covalima (RCCT) 26-03-24-Iha tinan anterior (2023) Servisu Munisipal Edukasaun Covalima konsege devolve hikas osan ho montante dolar amerikanu rihun atus ida nen nulu resin hitu, atus ida sanulu resin tolu, sentavus nen nulu resin lima ($ 167,113. 65) ba kofer estadu.
Ho ida ne’e, Xefe Departamentu Administrasaun Eskolar Munisipiu Covalima, Grigario Afonso Ferreira, informa, foin hakfodak bainhira simu despaixu atu fo fila osan dolar amerikanu rihun atus ida resin ne’e ba kaixa jeral estadu nia liu husi finansa munisipal.
“Saldo tinan anterior la’os ita maka ezekuta la hotu, maibe saldo anterior ne’e tanba iha loron toleransia do pontu ita la hatene tuir bainhira karta mai maka ita foin hakfodak, purtantu osan iha $ 167. 113, 65 ne’e ita devolve ba kofer estadu liu husi finansas munisipal, maibe osan merenda eskolar ba tinan kotuk nian ho montante $ 1.050,135.00” dehan Xefe Departamentu Administrasaun Eskolar Munisipiu Covalima, Gregario Afonso Ferreira, ba jornalista sira iha Salaun Administrsaun Munisipiu Covalima hafoin reprezenta Diretóra Servisu Munisipal Edukasaun akompaña Prezidente Autoridade Munisipal Covalima selebra asina Kontratu Programa Merenda Eskolar ho Kordenador Ekipa Jestaun Programa (EJP) 23 iha Covalima Segunda (25/03).
Notisia Relevante : https://radiosuai.blogspot.com/2024/03/pam-selebra-asina-akordu-pme-ho.html
Xefe Departamentu Administrasaun Eskolar Munisipiu Covalima, Gregario Afonso Ferreira, rekuñese konaba menus ba programa merenda eskolar nian iha tinan kotuk la tuir mata dalan tanba Ekipa Jestaun Programa (EJP) ema sira foun hotu.
“Relasiona ho regulamentu ba iha menu merenda eskolar nian ha’u hanoin ita tenke komprende tanba tempu ne’eba EJP ne’e ema mesak foun, programa merenda eskolar ne’e uluk implementa husi xefe gabinete sira mais agora, tinan uluk EJP ema mesak foun, ha’u hanoin iha grupu mos bainhira sira prepara hahan la tuir menu iha grupu laran ne’e ami fo kedas xamada atensaun ba no sira bele halo kedas mudansa imediata iha tempu ne’eba” nia klarifika.
Osan ba programa merenda eskolar ho montante $ 167, 113. 65, Servisu Edukasaun hatama fali ba kofer estadu ne’e tanba iha momentu ne’eba, loron feriadu la utiliza osan sira ne’e fo hodi fo merenda ba estudante sira, ho nune’e devolve fali osan ne’e ba kaixa jeral estadu liu husi finansas Munisipiu Covalima nian.
Jornalista : Julio Salinas
Editor : Chamot Nahac
