𝐃𝐈𝐋𝐈,𝟏𝟔/𝟏𝟎/𝟐𝟎𝟐𝟓: Vise-Primeiro Ministro, Minsitro Coordenador Assuntos Sociais e Prezidente CONSSAN TL, Mariano ASSANAMI Sabino, ne’ebé akompaña husi membru governu no parseiru dezenvolvimentu sira, halo abertura ba Selebrasaun loron ai-han Mundial, iha CCD.

Iha Diskursu Vise-Primeiru Ministru, ho onra bo’ot hodi halo abertura selebrasaun Loron Aihan Mundial 2025, hó tema global “Fo liman ba malu servisu ba aihan ne’ebe di’ak liu no ba futuru di’ak liu ” no tema nasionál “Seguransa Aihan nó Nutrisaun: Hametin Sistema Aihan Lokal ba Timor-Leste nia Futuru Saudável.” Tema sira ne’e, lori mensajen forte konaba unidade no responsabilidade koletiva atu fo enfaze ba nutrisaun ne’ebé  di’ak liu no sistema aihan ne’ebé sustentável ne’ebé presiza esforsu hamutuk.

Iha kontestu Timor-Leste, selebrasaun ne’e reforsa importansia atu hametin produsaun aihan lokal, hadi’a diversidade aihan, no promove konsumu ne’ebé saudavel no sustentavel. Ida-ne’e husu atu iha kompromisu foun atu serbisu hamutuk hodi garante katak sidadaun ida-idak iha asesu ba aihan ne’ebé seguru, nutritivu, no produz iha fatin lokal, hodi loke dalan ba Timor-Leste ida ne’ebé saudavel, reziliente liu tuir IX Governu Konstitusional ninia prioridade.

“Iha oportunidade ida ne’e, Ha’u hakarak hato’o apresiasaun kle’an ba ema hotklne’ebe fó ona apoiu finanseiru, kontribuisaun materia no asisténsia téknika hodi garante susesu selebrasaun nasionál ida-ne’e.”  Vise-Primeiro Ministro, Minsitro Coordenador Assuntos Sociais e Prezidente CONSSAN TL, Mariano ASSANAMI Sabino, dehan.

Seguransa aihan no nutrisaun sai sentrál ba ajenda dezenvolvimentu nasionál. Seguransa aihan no nutrisaun ne’e la’os deit aihan iha meza leten, maibé sira reprezenta saude, dignidade, no oportunidade ba sidadaun Timor-oan ida-Idak. Sistema aihan lokal ne’ebé forte maka xave ba populasaun ne’ebé saudavel. ekonomia rural ne’ebé buras, no futuru ne’ebé reziliente.

Tan ne’e, Vise Primeiru Ministru ba Asuntu Sosial, husu ba setór hotu-hotu atu kontinua servisu hamutuk hodi investe iha produsaun lokal, hodi fo apoiu ba agrikultor sira, hodi promove dieta saudavel, no hari Timor-Leste ida ne’ebé la iha ema ida mak hamlaha no labarik ida-idak bele sai forte no saudavel.

Reportazen RCCT