Covalima (RCCT) 07-07-25-Governu liu husi Ministeriu Kordenador Asuntu Ekonomia (MKAE) kontinua divulga informasaun ba Autoridade sira iha Munisipiu Covalima konaba pos adezaun Timor-Leste nian ba Organizasaun Mundial Komersiu (OMK).
Teknika OMK, Joanita Bendita da Costa Jong, hatete divulgasaun ida ne’e hanesan kontinuasaun husi atividade primeiru hala’o iha fulan kotuk ne’ebé halo ona lansamentu iha Munisipiu Likisa.
“Atividade ida ohin loron nian divulgasaun nasional konaba Timor-Leste nia pos adezaun ba Organizasaun Mundial Komersiu (OMK) nian hanesan kontinuasaun husi ita nia atividade dahuluk hala’o ona iha fulan kotuk, ne’ebé ita halo ona ninia lansamentu iha Munisipiu Likisa, no mos agora ne’e ita kontinuasatn deit atividades hodi divulga ba ita nia lider komunitaria sira hotu, sosiedade sivil, parte relijioza, setor privadu sira oinsa TL nian hare ba pos adezaun nian, nia benefisiu ne’e barak tebes tanba iha OMK nian ne’e wainhira TL sai ona membru iha 2024, nudar nasaun membru ba 166 nia benefisiu husi ne’eba maka primeiru husi merkadu nasaun membru sira ne’e” Teknika OMK, Joanita Bendita da Costa Jong, informa ba jornalista sira iha salaun enkontru Administrasaun Munisipiu Covalima, Segunda (07/07).
Prezidente Autoridade Munisipal (PAM) Covalima, Miguel Armada Cardoso “Razão” agradese ba governu liliu ba MKAE tanba liu husi divulgasaun ne’e bele fo oportunidade ba ema hotu liliu iha Covalima ne’ebé baliza kedas ho nasaun viziñu Indonezia.
“MKAE nia programa ida di’ak tebes hodi partilla informasaun ba ita liliu ho nia tema “Ita nia Lian, Ita Nia Futuru” tanba ne’e maka iha biban di’ak ida ne’e fo oportunidade ba ita, se wainhira la’o ona OMK ida ne’e, tanba sei lori ita ba iha ASEAN, ne’e agradese bele fo biban ona mai ita hotu atu bele interese ba ita nia rai ida ne’e liu husi OMK, ho biban ida ne’e fo oportunidade di’ak ba ita Munisipiu Covalima ne’ebé baliza direita ho Indonezia, liu husi hirak ne’e hotu hodi bele buka solusaun ba problema entre nasaun ida ho nasaun seluk, tanba ida ne’e maka fo hanoin ba ita hotu tantu servisu munisipal, delegasaun teritorial lider komunitaria sira, APA sira inklui parseiru dezenvolvimentu sira atu tau matan no fo interese ba informasaun sira ne’ebé divulga husi MKAE” nia dehan.
Atividade divulgasaun ne’e hala’o husi Ministeriu Kordenador Asuntu Ekonomia (MKAE) iha salaun administrasaun munisipiu covalima, partisipa husi Prezindete Autoridade Munisipiu Covalima, Diretór Servisu Munisipal sira, Administrador Postu Administrativu hitu no Xefe Suku 30, Xefe Aldeia 148 no Joventude sira. Engkuantu ativadades hanesan MAKE sei kontinua ba hala’o iha Munisipiu Ainaro iha loron 09 fulan Jullu 2025.
Jornalista : Julio Salinas
Editor : Chamot Nahac
