Covaliama (rcct) 16-07-25 Ajensia Internasional Food and Agriculture Organization (FAO) hamutuk ho Gorvernu liu husi Ministeriu Saude (MS), Ministeriu Agrikultur Pekuaria Peskas no Floresta (MAPF) inklui Konsellu Nasional Segurança no Soberania Alimentar no Nutrisional Timor-Leste (Sigla Portugés CONSSAN-TL) Fasilita formasaun ba katekista no Madre sira konaba Malnutrisaun.
Diretór Exekutivu CONSSAN TL Komar Mendonça hatete formasaun ne’e ho atu konsensializa konaba asuntu nutrisaun basa numeru mal nutrisaun as iha timor leste.
“Ita halo formasaun ba lider katolika sira iha Munisipiu Covalima objetivu atu bele konsensializa ita nia povu hodi bele komprende konaba asuntu nutrisaun ninian tan ita hatene katak iha ita nia rain numeru as tebes iha Covalima 49% mal nutrisaun husi numeru ne’e ita persiza atu bele dezemina informasaun konaba nutrisaun nian” Diretór Exekutivu CONSSAN TL Komar Mendonça, hatete.
Komar Mendonça relata formasaun ba lider relijiosas atu nune’e kada loron domingo bele fahe informasaun ba sarani sira hafoin remata serimonia eukaristia hodi bele dezenvolve produtu lokal hodi kontribuia ba hamenus malnutrisaun iha Covalima ne’ebé dadaun ne’e sa’e pursentu hat nulu resin sia.
“Persiza tebes ita bele fo formasaun ba ita ninia katakista sira no lider igreza sira atu nune’e kada domingo sira bele hato’o mensajen nutrisaun nian ba ita nia sarani sira para sira bele komprende konaba Manutrisaun tanba ita la dun fo informasaun ba sira entaun sira lahatene sira nafatin konsumu hahan ne’ebé mak la iha valor nutrisaun ne’ebé maka atu kontribui ba mal nutrisaun ne’ebé mak sei nafatin as tanba menus de kuiñesimentu parte ita nia sosiedade” Komar Mendonça, dehan.
Entretantu atividade ne’e hala’o iha salaun parokial igreja nossa señora de fatima suai, Kurta Loron 16 Fulan Jullu 2025.
Jornalista : Alfredo Barreto
Editor : Chamot Nahac
